ئەنجوومەنی باڵای فەتوا: خۆدزینەوە لە باج بە گرێبەستی ساختە حەرامە و فرۆشتنەوەی کاڵای قیست قەدەغە دەکرێت ئەنجوومەنی باڵای فەتوای هەرێمی کوردستان لە کۆبوونەوەی ئاسایی خۆیدا دوو بڕیاری شەرعیی گرنگی لەبارەی مامەڵە داراییەکان و چەوساندنەوەی مافی فەرمانبەرانی کەرتی تایبەت پەسەند کرد. لە تەوەری یەکەمدا، ئەنجوومەنەکە تاوتوێی دیاردەی فرۆشتنەوەی ئەو کاڵایانەی کرد کە بە قیست کڕدراون؛ بەپێی دەقی فەتواکە، فرۆشتنەوەی کەلوپەلەکە بە هەمان فرۆشیار پێش ئەوەی قیستەکانی تەواو بکرێت، لە ڕووی شەرعییەوە پەسەند نییە و کاری نادروستە (مەکرووهـە)، مەگەر لە کاتی ناچاریی تەواودا نەبێت کە سێ مەرجی سەرەکیی بۆ دانراوە: نەبوونی هیچ جۆرە ڕێککەوتنێکی ژێربەژێر لە نێوان کڕیار و فرۆشیاردا، وەرگرتنی تەواوەتیی کاڵاکە و هەبوونی دەسەڵاتی خاوەندارێتی لەلایەن کڕیارەوە، لەگەڵ ڕوونکردنەوە و دیاریکردنی وادەی دانەوەی یەکەمین قیست. سەبارەت بە شێوازی کارکردنی بەشێک لە پڕۆژە و کۆمپانیا و ناوەندە پەروەردەییە ئەهلییەکان، ئەنجوومەنی فەتوا پەردەی لەسەر فێڵێکی یاسایی و دارایی هەڵدایەوە کە تێیدا خاوەنکاران دوو گرێبەستی جیاواز لەگەڵ کارمەند و مامۆستایاندا دەکەن؛ گرێبەستێکیان بە ژمارە و مووچەی بەرز بۆ باج و لایەنە پەیوەندیدارەکانی حکوومەت، و گرێبەستێکی دیکەش بە کرێیەکی کەمتر و سەپاندنی کاری زیاتر بەسەر کارمەندەکەدا. ئەنجوومەنەکە ئەو هەنگاوەی کۆمپانیاکانی بە «حەرامی ڕەها، غەش و فێڵکردن، و خواردنی ماڵی خەڵک بە ناڕەوا» هەژمار کرد؛ هاوکات جەختیشی کردەوە کە بڕەپارەی وەرگیراوی کرێکاران حەڵاڵە بەڵام نابێت ڕاستییەکان لە لیژنەکانی چاودێری بشارنەوە، هاوکات داوای لە دەزگا ڕەسمییەکانی حکوومەتیش کرد چاودێریی توند بخەنە سەر کەرتی تایبەت و ڕێگە لە پێشێلکردنی مافی کارمەندان بگرن.

فەتوا لەسەر گرێبەستەکانی کەرتی تایبەت درا

بەڕێوەبەرایەتیی گشتیی کار و دەستەبەری کۆمەڵایەتیی هەرێمی کوردستان جێبەجێکردنی بڕیاری بەرزکردنەوەی کەمترین مووچەی خانەنشینانی کەرتی تایبەتی بۆ 500 هەزار دینار ڕاگەیاند، کە لە مووچەی مانگی ئەیلولەوە هەژمار دەکرێت. مەریوان بەگۆک عەزیز، بەڕێوەبەری گشتیی کار و دەستەبەری کۆمەڵایەتی ئاشکرای کرد، ئەو کرێکارانەی پێشتر مووچەکانیان لە نێوان 150 هەزار بۆ 400 هەزار دیناردا بووە، لەمەودوا کەمترین مووچەیان دەبێتە 500 هەزار دینار. مووچەکە هاوشێوەی فەرمانبەرانی کەرتی گشتی، بەپێی ساڵانی خزمەت، پسپۆڕی و دوایین مووچەی کاتی کارکردنیان هەژمار دەکرێت. بەپێی ڕێنماییەکان، مەرجی خانەنشینبوون بۆ پیاوان بە گەیشتن بە تەمەنی 60 ساڵی و 20 ساڵ خزمەت، بۆ ژنانیش بە 55 ساڵی و 20 ساڵ خزمەت دیاریکراوە. هاوکات ژمارەی ئەو کرێکارانەی دەستەبەری کۆمەڵایەتی دەیانگرێتەوە گەیشتووەتە زیاتر لە 350 هەزار کەس، کە 225 هەزار کەسیان لە سەردەمی کابینەی نۆیەمدا ناونووس کراون، پرۆسەی دابەشکردنی مووچەی مانگی ئەیلولیش بە گوژمە نوێیەکە دەستیپێکردووە.

موچەی ئەم چینە بەرز دەکرێتەوە 

ئەمڕۆ چوارشەممە، کەشناسی هەرێم رایگەیاند، پلەکانی گەرما بە شێوەیەکی گشتی کەمێک بەرز دەبێتەوە بەراورد بە تۆمارکراوەکانی دوێنێ، ئاسمان لەنێوان نیمچە هەور و هەوری تەواو دەبێت لە زۆربەی ناوچەکانی هەرێم, لەگەڵ ئەگەری کەمێک نمە باران هەیە لە ناوچە شاخاوییەکانی باکوور و باکووری رۆژئاوای هەرێم . بەرزترین پلەکانی گەرمای پێشبینیکراو بە پلەی سیلیزی
هەولێر: 30 پلەی سیلیزی&nbsp;
پیرمام: 25 پلەی سیلیزی
سلێمانی: 28 پلەی سیلیزی
هەڵەبجە:30 پلەی سیلیزی&nbsp;
چەمچەماڵ: 31 پلەی سیلیزی
دهۆک: 28 پلەی سیلیزی
زاخۆ: 27 پلەی سیلیزی&nbsp;
ئاکرێ:27 پلەی سیلیزی&nbsp;
گەرمیان:37 پلەی سیلیزی&nbsp;
حاجی ئۆمەران:17 پلەی سیلیزی
 سبەی پێنج شەممە، پلەکانی گەرما بەشێوەیەکی گشتی کەمێک بەرز دەبێتەوە تەنها لە سنووری پارێزگای دهۆک نەبێت کەمێک نزم دەبێتەوە بەراورد بە تۆمارکراوەکانی ئەمڕۆ، ئاسمان هەوری تەواو دەبێت لە ئەنجامی کاریگەری لاوازی نزمە پەستانی دەریایی سپی ناوەراست, سەرەتا باران بارین لە سنووری پارێزگای دهۆک و ئیدارەی سەربەخۆی زاخۆ دەست پێ دەکات بەشێوەی نمە باران و بارانی مام ناوەند دەبێت هەندێک جار هەورە بروسکەشی لەگەڵ دەبێت , پاشان باران بارینەکە دەگاتە سنووری پارێزگای هەولێر و ئیدارەی سەربەخۆی سۆران بەشێوەی نمە باران و بارانی مام ناوەند وە تاکو درەنگانی شەو کاریگەری ئەم شەپۆڵە لەسەر ئەم ناوچانە بەردەوامی دەبێت .&nbsp;&nbsp;&nbsp;&nbsp;&nbsp;
 بەرزترین پلەکانی گەرمای پێشبینیکراو بە پلەی سیلیزی
هەولێر: 31 پلەی سیلیزی&nbsp;
پیرمام: 26 پلەی سیلیزی
سلێمانی: 29 پلەی سیلیزی
هەڵەبجە:31 پلەی سیلیزی&nbsp;
چەمچەماڵ: 32 پلەی سیلیزی
دهۆک: 27 پلەی سیلیزی
زاخۆ: 26 پلەی سیلیزی&nbsp;
ئاکرێ:26 پلەی سیلیزی&nbsp;
گەرمیان:38 پلەی سیلیزی&nbsp;
حاجی ئۆمەران:17 پلەی سیلیزی

پلەکانی گەرمان بەرزدەبێتەوە

دوا مۆڵەت دیاری دەکرێت هۆشداریی سزادان دەدرێتە بریکارەکانی خۆراک لە سلێمانی بەڕێوەبەرایەتیی بازرگانیی کەلوپەلی خۆراکی سلێمانی لە ئاگادارییەکی فەرمیدا داوا لە بریکارەکانی ناوشار دەکات لە ڕۆژی چوارشەممە 14-10-2026ـەوە دەست بە دانانی (ئیداع) پارەی سەبەتەی شەشەمی خۆراکی ئەمساڵ بکەن و دوا وادەش بۆ ئەو پرۆسەیە 18ی ئەم مانگە دەبێت. بەپێی گشتاندنەکەی بەڕێوەبەرایەتییەکە پارەکە بە شێوەی کاش لە ڕێگەی بانکی «جنوب ئیسلامی» وەردەگیرێت بە مەرجی پێشکەشکردنی کارتی بانکی و کارتی نیشتمانی هاوکات جەخت کراوەتەوە کە هەر بریکارێک لە کاتی دیاریکراودا پارەکە ڕادەست نەکات، بەپێی ڕێنماییەکانی بەغدا سزای دارایی (غەرامە) دەدرێت و ڕووبەڕووی لێپێچینەوە دەبێتەوە.

دوامۆڵەت بۆ بریکارەکانی خۆراک دیاری کرا

وەزارەتی بازرگانی و پیشەسازی لەگەڵ نوێنەرانی کەرتی بازرگانی لە کۆبوونەوەیەکی هاوبەشدا لێکەوتەکانی گۆڕانکاریی نرخی دۆلاریان لەسەر بازاڕەکانی هەرێمی کوردستان تاوتوێ کرد؛ لە کۆبوونەوەکەدا داوا لە حکوومەتی فیدراڵ کرا باج و ڕسووماتی گومرگی لەسەر کەلوپەل و پێداویستییە خۆراکییەکان لاببات، بە مەبەستی ڕێگریکردن لە گرانبوونی کاڵاکان و کەمکردنەوەی بارگرانی لەسەر بژێویی هاووڵاتییان. کۆبوونەوەکە بە بەشداریی بریکاری وەزارەتی بازرگانی، بەڕێوەبەری گشتیی بازرگانی، لقی هەولێری یەکێتیی هاوردە و ناردنکاران و ژووری بازرگانی بەڕێوەچوو گفتوگۆی چڕ لەسەر ئاسانکاریی گومرگی بۆ بازرگانان و پاراستنی سەقامگیریی نرخەکان کرا. لەوبارەیەوە، ڕەسووڵ حاجی عومەر، سەرۆکی لقی هەولێری هاوردە و ناردنکاران ڕایگەیاند پێویستە بازرگانان ڕەچاوی دۆخی دارایی هاووڵاتییان بکەن و دەستکاریی نادروستی نرخەکان نەکەن، هاوکات نوێنەرانی بازرگانانیش لەپێناو بەردەوامیی دابینکردنی پێداویستییەکان، ئاستەنگ و کێشەکانی بەردەم هاوردەکردنی کاڵاکانیان ئاراستەی لایەنە پەیوەندیدارەکان کرد.

داوا دەکرێت گومرگی سەر خۆراک هەڵبگیرێت

قەدەغەکردنی باڵاپۆشی لە قوتابخانەکانی ئازەربایجان ڕێگری لە سەدان خوێندکار دەکرێت و ناڕەزایەتییەکان تەقینەوە ناوەندەکانی خوێندن لە ئازەربایجان دەرگاکانیان بەڕووی ئەو کچە خوێندکارانەدا داخست کە باڵاپۆشن و ڕێگری لە چوونەژوورەوەیان دەکەن، ئەم هەنگاوەش شەپۆلێکی فراوانی تووڕەیی و ناڕەزایەتیی لەنێو خوێندکاران و کەسوکاریاندا دروستکردووە. پەرەسەندنی ئەم دۆخە دوای بڕیارێکی ئەنجوومەنی وەزیرانی ئازەربایجان بە سەرۆکایەتیی عەلی ئەسەدۆڤ دێت، کە لە 21ی ئەیلولی ڕابردوودا گۆڕانکاریی لە ڕێساکانی پۆشاکی یەکپۆشیی خوێندکاراندا پەسەند کرد. ئەگەرچی لە دەقی ڕێنماییە نوێیەکاندا بە ڕوونی ناوی «حیجاب» نەهێنراوە، بەڵام جەخت لەوە کراوەتەوە کە هەڵبژاردنی هەر پۆشاکێک پێچەوانەی شێوازی یەکگرتووی جلوبەرگ و پرەنسیپی «سێکولاریزم»ی دەوڵەت بێت قەدەغەیە؛ بەمەش دەسەڵاتی قوتابخانەکان بڕیارەکەیان وەک هێڵی سوور لەسەر پۆشینی حیجاب لە ناوەندەکانی پەروەردەدا لێکداوەتەوە و جێبەجێی دەکەن.

باڵاپۆشی لە قوتابخانەکان قەدەغە دەکرێن

ناوەندی قەزای کەلار شەوێکی نائارامی بەڕێکرد، دوای ئەوەی کۆمەڵێک چەکداری نەناسراو هێرشێکی چڕیان کردە سەر ئۆتۆمبێلی تایبەتی هاوڕێ جەلیل، لێپرسراوی پۆلیسی دارستان و ژینگەی قەزای خانەقین. بەگوێرەی لێکۆڵینەوە مەیدانییەکان، دەستڕێژەکە ڕاستەوخۆ بەشی دواوە و شوێنی عەمباری سووتەمەنیی ئۆتۆمبێلەکەی کردووەتە نیشانە، بە مەبەستی دروستکردنی تەقینەوە و ئاگرکەوتنەوە، بەڵام پیلانەکە تەنها زیانی مادیی لێکەوتەوە و لەو کاتەدا کەسی تێدا نەبووە. ئەو لێپرسراوە ئەمنییە دووپاتی کردەوە کە پەلامارەکە لە پێش دەرگای ماڵەکەی ئەنجامدراوە و دەستبەجێ بەڵگە سەرەتاییەکان ڕادەستی دەزگا ئەمنییەکانی سنووری گەرمیان کراون، هاوکات دۆسیەی یاسایی بۆ ڕووداوەکە کراوەتەوە تا ناسنامەی تەقەکەرەکان و سەرچاوەی پیلانەکە ئاشکرا بکرێن.

پەلامارێکی چەکداری لە گەرمیان؛ دەستڕێژ لە شوێنی مانەوەی بەرپرسێکی باڵای پۆلیس دەکرێت

حکوومەتی عێراق ئاشکرای کرد، بەهۆی ئەو دۆخە داراییە سەختەی بەرۆکی وڵاتەکەی گرتووە، بە فەرمی داوای لە کۆماری ئیسلامیی ئێران کردووە ڕێگە بە تێپەڕین و هەناردەکردنی نەوتی عێراق لە ڕێگەی گەرووی هورمزەوە بدات، بەڵام تاران تا ئێستا بە تەواوی داواکارییەکەی بەغدای بێوەڵام هێشتووەتەوە. حەیدەر عەبوودی، وتەبێژی حکوومەتی عێراق ڕایگەیاند، ئەم داواکارییە فەرمییەی بەغدا بە ئامانجی ڕێگریکردن بووە لە داڕمانی زیاتری دارایی و ئابووریی وڵات، بەڵام بێدەنگی و بێوەڵامیی لایەنی ئێرانی قەیرانە داراییەکەی زیاتر ئاڵۆز کردووە. عەبوودی جەختی لەوەش کردەوە کە ئابووریی عێراق کەوتووەتە ژێر گەمارۆیەکی قورسەوە و لە ئاستی نێودەوڵەتی و ناوچەییشدا هیچ لایەنێک کارئاسانی بۆ هەناردەکردن و هەناردەکردنەوەی نەوتەکەی ناکات. داخستن و پەکخستنی هاتوچۆی کەشتییە نەوتییەکان لە گەرووی ستراتیژیی هورمز، کە شاڕەگی سەرەکیی هەناردەی نەوتی خاوی عێراقە بۆ بازاڕەکانی جیهان، داهاتی گشتیی وڵاتەکەی خستووەتە بەردەم مەترسییەکی گەورەوە؛ بە تایبەت کە بەغدا بۆ پڕکردنەوەی خەرجی و مووچەی مانگانە زیاتر لە 90% پشت بە فرۆشتنی نەوت دەبەستێت.

ئێران ڕێگای نەوتی عێراقی لە هورمز داخست

هەریەک لە وڵاتانی تورکیا، پاکستان، میسر و عەرەبستانی سعوودیە لە ڕاگەیەندراوێکی هاوبەشدا هێرشەکانی حووسییەکانی یەمەنیان بۆ سەر فڕۆکەخانەی نێودەوڵەتیی ڕیاز بە توندی شەرمەزار کرد و بە «هەڵکشانێکی مەترسیدار» بۆ سەر ئاسایش و سەقامگیریی نێودەوڵەتی وەسفیان کرد. دەسەڵاتدارانی سعوودیە پشتڕاستیان کردەوە کە ڕۆژی یەکشەممە لە نوێترین هێرشدا بۆ سەر فڕۆکەخانەی ڕیاز کەسێک کوژراوە و نزیکەی 12 کەسی دیکەش بریندار بوون، ئەمەش دوای ئەوە هات کە حووسییەکان بانگەشەی ئەوەیان کردبوو ڕۆژێک پێشتر بەهۆی هێرشێکی هاوشێوەوە 13 کەس کوژراون و زیاتر لە 300 کەسی دیکەش بریندار بوون. لە بەیاننامە چوارقۆڵییەکەدا جەخت کراوەتەوە کە حووسییەکان بەرپرسیاری تەواوی ئەم هێرشانە و لێکەوتەکانیانن، هاوکات پشتیوانیی ڕەهای خۆیان بۆ هەر هەنگاوێکی سعوودیە بە مەبەستی پاراستنی خاک و ڕێگری لە دووبارەبوونەوەی هەڕەشەکان دەربڕی و داوای ڕاگرتنی دەستبەجێی ئەو پەلامارانەیان کرد. ئەم کاردانەوەیە لە کاتێکدایە کە لە مانگی ئابی ڕابردوودا، تورکیا و پاکستان لە چوارچێوەی هاوپەیمانییەکدا ڕێککەوتنێکی بەرگریی هاوبەشیان لەگەڵ سعوودیە واژۆ کرد کە بەپێی بەندەکانی، هەر پەلامارێک بۆ سەر لایەنێک وەک هێرش بۆ سەر تەواوی لایەنەکان هەژمار دەکرێت. لەم بارەیەوە، هاکان فیدان وەزیری دەرەوەی تورکیا ئاماژەی بەوە کرد کە وڵاتەکەی هەڵسەنگاندن بۆ چۆنیەتیی پێشکەشکردنی هاوکاری بۆ ڕیاز دەکات، بەڵام جێگیرکردنی سەرباز یان بەشداریکردن لە ئۆپەراسیۆنی هێرشبەری ڕەتکردەوە؛ هاوکات بەپێی زانیارییەکان چاوەڕوان دەکرێت پەرلەمانی تورکیا لە ڕۆژانی داهاتوودا بە فەرمی ڕێککەوتننامە بەرگرییە هاوبەشەکە پەسەند بکات بە مەبەستی چڕکردنەوەی پشتیوانییە سەربازی و تەکنیکییەکان بۆ سعوودیە و پاراستنی کەشتیوانی لە دەریای سووردا.

پەلاماردانی ڕیاز هاوپەیمانییە بەرگرییەکەی هێنایە دەنگ

بڕیارە هەفتەی داهاتوو دەست بە دابەشکردنی نەوتی سپی ماڵان بکرێت، بە وتەی پەرلەمانتارێک هێشتا نرخەکەی دیاری نەکراوە. لە ڕاگەیەندراوێکدا ئاماژە بەوە کراوە، هەفتەی داهاتوو نەوتی سپیی ماڵان دەگاتە سەرجەم ناوچەکانی هەرێمی کوردستان و دەست بە دابەشکردنی دەکرێت، بەڵام هێشتا نرخەکەی دیارینەکراوە. ئەمە لەکاتێکدایە بەهۆی دابەشنەکردنی نەوتی سپی ماڵانەوە لە لایەن حکومەتی عێراق و حکومەتی هەرێمەوە، نرخی بەرمیلێک نەوتی ماڵان لە بازاڕی ڕەش گەیشتووەتە سەرو 300 هەزار دینار.

دابەشکردنی نەوت 

لە نوێترین پەرەسەندنی قەیرانی نێوان واشنتن و تاران، موحسین ڕەزایی، سکرتێری ئەنجوومەنی باڵای ئاسایشی نەتەوەیی ئێران، ئەمڕۆ دووشەممە هەڕەشەی کرد کە لە ئەگەری سەرهەڵدانەوەی هەر پێکدادانێکی سەربازیدا، سوپای وڵاتەکەی کێبڵە دەریاییەکان، سەنتەرەکانی داتا و دامەزراوەکانی ژیریی دەستکرد لە سەرانسەری ناوچەکەدا دەکاتە ئامانج. ڕەزایی ئاماژەی بەوە کرد کە تاران دوایین وەڵامی ئەمریکای سەبارەت بە پێشنیازی کۆتاییهێنان بە شەڕ بە «ناتەواو» هەژمار کردووە؛ جەختیشی کردەوە کە واشنتن تەنها لەگەڵ بەشێک لە حەوت مەرجەکەی ئێراندا هاوڕا بووە و مەرجەکانی دیکە بە ناڕوونی ماونەتەوە، بۆیە ئێران هیچ وەڵامێکی دیکە ناداتەوە تا ئەو کاتەی لایەنی ئەمریکی هەڵوێستی خۆی بە تەواوی ڕوون دەکاتەوە. ئەم لێدوانە توندانەی تاران هاوکاتە لەگەڵ کۆبوونەوە و ڕاوێژە ئەمنییەکانی بنیامین نەتانیاهۆ، سەرۆک وەزیرانی ئیسرائیل، دوابەدوای لێدوانەکانی دۆناڵد ترەمپ سەرۆکی ئەمریکا سەبارەت بە ئەگەری دەستپێکردنەوەی هێرشە سەربازییەکان. بەپێی زانیارییەکانی کەناڵی 13ی ئیسرائیل، هێشتا بڕیاری دەستپێکردنەوەی ئۆپەراسیۆنە سەربازییەکان نەدراوە بەڵام هاوئاهەنگیی تەلئەبیب لەگەڵ سوپای ئەمریکا بەردەوامە؛ ئەمەش لە کاتێکدایە کە پێشتر ڕۆژنامەی نیویۆرک تایمز ئاشکرای کردبوو ترەمپ داوای لە پێنتاگۆن کردووە پلان بۆ ئۆپەراسیۆنێکی چڕوپڕی 3 ڕۆژە دژی پێگەکانی ئێران دابڕێژێت. ململانێی سەربازیی نێوان ئێران و بەرەی ئەمریکا و ئیسرائیل لە ساڵی 2026دا و دوای هێرشە مووشەکییەکان و جەنگە 40 ڕۆژەکە گەیشتووەتە ئاستێکی هەستیار؛ هەڕەشە نوێیەکانی تاران بۆ پەکخستنی کێبڵ و ژێرخانی تەکنەلۆژیای ناوچەکە ئاماژەیە بۆ ئەوەی لە ئەگەری دەستپێکردنەوەی شەڕ، ئاستی ڕووبەڕووبوونەوەکان سنوری ئاسایی سەربازی تێدەپەڕێنێت.

ئێران هەڕەشەی لێدانی سەنتەرەکانی داتا و ژێرخانی دیجیتاڵی دەکات

مشتومڕی دابەزین یان بەرزبوونەوەی نرخی دۆلار بەرامبەر دینار پرسێکی ڕۆژانەی هاووڵاتییان و ناوەندە ئابوورییەکانە، بەڵام هاوکێشەی دراوی بەهێز یان لاواز لایەنی ئەرێنی و نەرێنیی تایبەت بە خۆی هەیە، بەتایبەت لە ئابوورییەکی وەک عێراقدا کە زۆرینەی پێداویستییەکانی لە دەرەوە دەهێنێت.
کاتێک دینار بەهێز دەبێت، هاوردەکردنی خواردن، دەرمان، ئۆتۆمبێل و کاڵا تەکنەلۆژییەکان هەرزانتر دەوەستێت، ئەمەش دەستبەجێ هەڵاوسان دادەبەزێنێت و هێزی کڕینی مووچەی هاووڵاتی زیاد دەکات، هاوکات گەشتکردن و دانەوەی قەرزی دەرەکیش ئاسانتر دەبێت؛ لەگەڵ ئەوەشدا، هەرزانیی کاڵای بیانی کێبڕکێ لەسەر کارگە و جووتیارانی ناوخۆ توند دەکات و داهاتی نەوتیی حکومەتیش کاتێک دەگۆڕدرێتەوە بۆ دینار کەمی دەکات.
لە بەرامبەردا، کاتێک بەهای دینار دادەبەزێت، حکومەت لە گۆڕینەوەی دۆلاری نەوتدا دیناری زیاتری دەست دەکەوێت و گرانیی کاڵای هاوردەش دەرفەتێک بە بەرهەمی ناوخۆ دەدات پێشبکەوێت, بەڵام باجی ئەمە گرانیی لەناکاوی بازاڕ، دابەزینی بەهای پاشەکەوت و کەمبوونەوەی بەرچاوی هێزی کڕینی مووچەخۆرانە. بەهۆی ئەوەی عێراق بەرهەمهێنەرێکی گەورەی ناوخۆیی نییە، ئابووریناسان پێیان وایە پاراستنی سەقامگیریی دینار بۆ ئێستای بژێوی خەڵک لەپێشینەترە، بەو مەرجەی هاوتەریب کار بۆ هەمەچەشنکردنی سەرچاوەکانی داهات بکرێت.&nbsp;

سینەمای قەلەم

گەڕان بکە بۆ نوێترین فیلم و دراما جیهانیەکان لە سینەمای قەڵەم بە زمانی کوردی و بیانی

نوێترین