ترەمپ: نرخی بەنزین کەمتر دەبێتەوە لەوەی پێش دەستپێکردنی شەڕەکە هەبووە
سەرۆکی ئەمریکا لە نوێترین لێدوانیدا سەبارەت بە گرژییەکانی ناوچەکە، ئاماژەی بە کۆتاییهێنان بە ئۆپەراسیۆنە سەربازییەکان نەکرد و هیچ وردەکارییەکی لەسەر چۆنیەتیی گەیشتن بە ڕێککەوتن لەگەڵ ئێران نەخستەڕوو.
سەبارەت بە نرخی سووتەمەنی، دۆناڵد ترەمپ ئاستێکی دیاریکراوی دەستنیشان نەکرد کە پێشبینی دەکات نرخی بەنزین پێی بگات، بەڵام جەختی لەوە کردەوە نرخی بەنزین لە داهاتوودا کەمتر دەبێت لەو ئاستەی پێش دەستپێکردنی شەڕەکە هەبووە.
ئەم پەیامانەی سەرۆکی ئەمریکا لە کاتێکدان کە ناوبراو بەردەوامە لە دووپاتکردنەوەی هەڵوێستی وڵاتەکەی، بەوەی ڕێگریکردن لە بەدەستهێنانی چەکی ئەتۆمی لەلایەن ئێرانەوە، یەکێکە لە ئامانجە سەرەکی و بنەڕەتییەکانی واشنتن بەرامبەر بە تاران.

پەیامێکی نوێ لە ترەمپەوە دەربارەی داهاتووی نرخی سووتەمەنی و شەڕ

قەدەغەکردنی باڵاپۆشی لە قوتابخانەکانی ئازەربایجان ڕێگری لە سەدان خوێندکار دەکرێت و ناڕەزایەتییەکان تەقینەوە ناوەندەکانی خوێندن لە ئازەربایجان دەرگاکانیان بەڕووی ئەو کچە خوێندکارانەدا داخست کە باڵاپۆشن و ڕێگری لە چوونەژوورەوەیان دەکەن، ئەم هەنگاوەش شەپۆلێکی فراوانی تووڕەیی و ناڕەزایەتیی لەنێو خوێندکاران و کەسوکاریاندا دروستکردووە. پەرەسەندنی ئەم دۆخە دوای بڕیارێکی ئەنجوومەنی وەزیرانی ئازەربایجان بە سەرۆکایەتیی عەلی ئەسەدۆڤ دێت، کە لە 21ی ئەیلولی ڕابردوودا گۆڕانکاریی لە ڕێساکانی پۆشاکی یەکپۆشیی خوێندکاراندا پەسەند کرد. ئەگەرچی لە دەقی ڕێنماییە نوێیەکاندا بە ڕوونی ناوی «حیجاب» نەهێنراوە، بەڵام جەخت لەوە کراوەتەوە کە هەڵبژاردنی هەر پۆشاکێک پێچەوانەی شێوازی یەکگرتووی جلوبەرگ و پرەنسیپی «سێکولاریزم»ی دەوڵەت بێت قەدەغەیە؛ بەمەش دەسەڵاتی قوتابخانەکان بڕیارەکەیان وەک هێڵی سوور لەسەر پۆشینی حیجاب لە ناوەندەکانی پەروەردەدا لێکداوەتەوە و جێبەجێی دەکەن.

باڵاپۆشی لە قوتابخانەکان قەدەغە دەکرێن

وەزارەتی بەرگریی ئەمریکا (پێنتاگۆن) بڕیارێکی چاوەڕواننەکراوی ئاشکرا کرد و ڕایگەیاند، پڕۆسەی لەسێدارەدانی نیزال مالیک حەسەن، ئەنجامدەری تەقەکردنەکەی ساڵی 2009ی بنکەی فۆرت هوود، بە دەستڕێژی گوللە و لە ڕێگەی پەخشی ڕاستەوخۆوە بۆ ڕای گشتی دەگوازرێتەوە؛ ئەمەش دەبێتە یەکەم لەسێدارەدانی سەربازی لە وڵاتەکەدا لە ماوەی زیاتر لە 65 ساڵی ڕابردوودا.

سوپای ئەمریکا ڕایگەیاندووە کە لەسێدارەدانەکە لە 3ی کانوونی یەکەمی 2026 لە فۆرت هوود بەڕێوەدەچێت، دوای ئەوەی دۆناڵد ترەمپ بڕیارەکەی پەسەند کرد؛ حەسەن لە ساڵی 2009 بە تەقەکردن لە سەربازانی بنکەکە 13 کەسی کوشت و 32 کەسی دیکەی بریندار کرد. پیت هێگسێت، وەزیری بەرگریی ئەمریکا جەختی کردەوە کە پڕۆسەکە بە تەواوی بۆ خەڵک ئاشکرا دەبێت و وتی: "دڵنیادەبینەوە لەوەی خەڵک دەتوانێت بیبینێت". لە لایەکی دیکەوە، پسپۆڕانی یاسایی و مافەکانی مرۆڤ ئەم هەنگاوەیان خستووەتە ژێر پرسیارەوە و بە نمایشی سیاسی ناوزەندی دەکەن، هاوکات ئاماژە بەوە دەکەن حەسەن دەتوانێت لە دادگای مەدەنیدا تانە لە بڕیارەکە بدات و پڕۆسەکە بۆ ماوەیەکی زۆر دوابخات.

گوللەبارانکردنی حەسەن دەکرێتە پەخشی ڕاستەوخۆ

فەرەنسا لەژێر شەپۆلی ناڕەزایەتیی خوێندکاراندایە بەڵێنی دامەزراندنی 3 هەزار مامۆستا ناڕەزایەتییەکانی هێور نەکردەوە
شەپۆلێکی بەرفراوانی خۆپیشاندانی خوێندکارانی ئامادەیی و زانکۆکان فەرەنسای گرتووەتەوە و گرژییەکان لەنێوان خۆپیشاندەران و هێزە ئەمنییەکاندا گەیشتوونەتە لوتکە. خۆپیشاندەران داوای زیادکردنی بودجەی کەرتی پەروەردە، نۆژەنکردنەوەی قوتابخانەکان، کەمکردنەوەی کاتژمێرەکانی خوێندن و باشترکردنی ڕەوشی ناوەندەکانی خوێندن دەکەن، هاوکات بڕیاری حکومەت بۆ دامەزراندنی بەپەلەی 3 هەزار مامۆستاش نەبووەتە هۆی هێوربوونەوەی شەقام.
بەپێی ئامارەکانی وەزارەتی ناوخۆی فەرەنسا، تەنها لە ڕۆژی پێنجشەممەدا زیاتر لە 71هەزار و 500 کەس لە سەرانسەری وڵاتدا ڕژاونەتە سەر شەقامەکان، کە 24 هەزار و 500 کەسیان لە پاریسی پایتەخت بوون و لەو چوارچێوەیەشدا زیاتر لە 500 کەس دەستگیرکراون. ئاڵۆزییەکان لە کاتێکدایە کە لە ڕێکەوتی 28ی ئەیلوولەوە تا ئێستا، 6 هەزار و 629 کەس دەستبەسەر کراون، هاوکات 215 خوێندکار، 89 مامۆستا و ٧٦١ کارمەندی پۆلیس بریندار بوون. توندوتیژییەکانی پۆلیس و بەکارهێنانی بۆمبی دەنگی کە بووەتە هۆی پەڕینی دەستی مێرمنداڵێک و شکانی شەوییلەی مێرمنداڵێکی دیکە، ڕەخنەی توندی ڕێکخراوەکانی مافی مرۆڤی لێکەوتووەتەوە.
لە بەرامبەر فراوانبوونی ناڕەزایەتییەکان و داخرانی 375 قوتابخانە، ئێدوار جیفرای وەزیری پەروەردەی فەرەنسا ڕایگەیاند کە لە چەند کاتژمێری داهاتوودا 3 هەزار مامۆستای نوێ ڕەوانەی ناوەندەکانی خوێندن دەکرێن و بەم زووانەش چەند سەد مامۆستایەکی دیکەش دادەمەزرێنرێن. لەگەڵ ئەوەشدا، ڕێکخەرانی خۆپیشاندانەکان داوای ڕۆژێکی نوێی مانگرتن و ناڕەزایەتییان لە ڕۆژی سێشەممە 13ی تشرینی یەکەم کردووە و ڕایانگەیاندووە تا بەدەستهێنانی تەواوی داواکارییە کردارییەکانیان لە شەقامەکان ناکشێنەوە؛ ئەمەش گوشارێکی قورسی لەسەر حکومەتەکەی ئیمانوێل ماکرۆن پێش هەڵبژاردنەکانی نیسان دروست کردووە.&nbsp;

فەرەنسا لەژێر گوشاری تووڕەیی خوێندکاراندایە

دوایـــن زانــیــاری لەبـارەی ناکۆکیەکانی ئەمریکاو ئێران&nbsp;
بەرپرسانی کۆماری ئیسلامیی ئێران ڕۆژی چوارشەممە ڕایانگەیاند کە وەڵامی فەرمیی ئەمریکایان سەبارەت بە پێشنیازەکەی تاران بۆ کۆتاییهێنان بە جەنگی حەوت مانگەی ناوچەکە پێگەیشتووە.
ئەمەش دوای ئەوە دێت کە دۆناڵد ترەمپ سەرۆکی ئەمریکا چەند ڕۆژێک لەمەوبەر بە ئاشکرا ڕەتکردنەوەی پێشنیازەکەی ئێرانی ڕاگەیاندبوو.&nbsp;
لایەنی ئێرانی هیچ وردەکارییەکی لەسەر ناوەڕۆکی نامەکە ئاشکرا نەکردووە و ڕوونی نەکردووەتەوە کە ئایا وەڵامەکە بە ئەرێنییە یان بە نەرێنیە.
فاتیمە موهاجیرانی، وتەبێژی حکوومەتی ئێران بۆ ئاژانسی فەرمیی هەواڵی وڵاتەکەی ڕایگەیاند، عەباس عێراقچی وەزیری دەرەوەی ئێران وەڵامەکەی واشنتنی لە میانەی کۆبوونەوەی ئەنجوومەنی وەزیراندا ڕادەستی مەسعوود پزیشکیان، سەرۆککۆماری ئێران کردووە.&nbsp;
لەو بارەیەوە پزیشکیان ڕایگەیاند کە تەواوی هەوڵی خۆیان دەدەن تا ڕێککەوتنەکە بگاتە ئەنجام و بە توندی بەرگری لە مافەکانی گەلی ئێران دەکەن و پێویستە ڕێککەوتنەکە لەسەر بنەمای «بردنەوە-بردنەوە» بۆ هەردوولا بونیاد بنرێت.
ئەم پێشهاتانە دوای گەڕانەوەی عێراقچی دێت لە شاری نیویۆرک کە بە مەبەستی بەشداریکردن لە کۆبوونەوەکانی کۆمەڵەی گشتیی نەتەوە یەکگرتووەکان سەردانی ئەمریکای کردبوو، لەوێ شاندی تاران لە ڕێگەی نێوەندگیرانی قەتەری و پاکستانییەوە گفتوگۆی ناڕاستەوخۆیان لەگەڵ لایەنی ئەمریکیدا ئەنجام دابوو.

وەزیری دەرەوەی ئێران ئەنجوومەنی وەزیرانی وڵاتەکەی لە وردەکاریی گەشتەکەی بۆ نیویۆرک و کۆبوونەوە دیپلۆماسییەکانی ئاگادار کردەوە، لەوانەش گەیاندنی مەرجەکانی تاران لە ڕێگەی نێوەندگیرەکانەوە بە مەبەستی کردنەوەی گەرووی هورمز، وەک ئەوەی وتەبێژی حکوومەت ئاماژەی پێداوە
عێراقچی هەفتەی ڕابردوو ڕایگەیاندبوو کە پێشنیازی کردووە گەرووەکە لە ماوەی یەک هەفتەدا بەڕووی هاتوچۆی دەریاییدا بکرێتەوە، بەڵام ئەم هەنگاوە بەستراوەتەوە بە چەند داواکارییەکی سەرەکی لە واشنتن.
&nbsp;لە سەرووی هەمووشیانەوە هەڵگرتنی گەمارۆی سەر بەندەرەکانی ئێران لەلایەن ویلایەتە یەکگرتووەکانەوە، ئازادکردنی پارە و سامانی سڕکراوی ئێران، و لابردنی سزاکان لەسەر هەناردەکردنی نەوتی ئەو وڵاتە.
دۆناڵد ترەمپ، سەرۆکی ئەمریکا بە خێرایی پێشنیازەکەی تاران بۆ کردنەوەی گەرووی هورمزی ڕەتکردەوە و ڕایگەیاند کە ئێران بەهۆی ئەوەی «بە توندی خەریکە دەدۆڕێت» دەیەوێت ڕێککەوتن بکات، بەڵام دەستپێشخەرییەکەی بەو شێوازەی ئێستا «قبووڵکراو نییە».&nbsp;
سەرەڕای ئەم ڕەتکردنەوە ئاشکرایەی ترەمپ، نێوەندگیرە نێودەوڵەتییەکان بەردەوامن لە هەوڵەکانیان لەگەڵ بەرپرسانی ئێران و ویلایەتە یەکگرتووەکان تا لەسەر کۆتاییهێنان بە شەڕ و کردنەوەی ڕێڕەوە ئاوییەکە بگەنە ڕێککەوتن، وەک ئەوەی چەند بەرپرسێکی ئاگادار بە مەرجی ئاشکرانەکردنی ناویان باسیان لێوە کردووە.
لەگەڵ تەمومژاویبوونی ئاسۆی گەیشتن بە ڕێککەوتنی کۆتایی لە نێوان هەردوولادا، ئیدارەی ترەمپ جەخت دەکاتەوە کە بەردەوام دەبێت لە فراوانکردنی جەنگی ئابووری و سەپاندنی گوشاری زیاتر بەسەر کۆماری ئیسلامیی ئێراندا.

وەزارەتی گەنجینەی ئەمریکا ڕۆژی سێشەممە، پاکێجێکی نوێی سزاکانی ئاشکرا کرد، کە تیایدا ژمارەیەک کەسایەتی و کۆمپانیای لە سەرانسەری جیهاندا کردووەتە ئامانج، بەپێی تۆمەتەکانی واشنتن، ئەم لایەنانە ڕۆڵی کارئاسانکەری دارایی یان پشتیوانیکەری سەرەکییان بینیوە لە دابینکردنی پێداویستی و کەرەستەکان بۆ تۆڕی دابینکاریی سەربازیی ئێران.
ئەم هەنگاوەی کۆشکی سپی بەشێکە لە هەڵمەتێکی فراوان بە ناوی «ئۆپەراسیۆنی دابڕاوی ئابووری»، کە ئامانج لێی پچڕاندنی تەواوەتیی دەمارە داراییە سەرەکییەکانی حکوومەتی ئێرانە، ئەو حکوومەتەی پێشتریش لەژێر بارگرانیی سزای تونددابوو.
لە چوارچێوەی ئەم بڕیارەدا، دە کەسایەتی و قەوارەی ئابووری لە ئێران، هۆنگ کۆنگ و پاکستان ڕووبەڕووی سزای نوێ بوونەتەوە، ئەمەش بەهۆی تۆمەتبارکردنیان بە کڕین و دابینکردنی چەک و پارچەی سەربازی بۆ وەزارەتی بەرگریی ئێران لە میانەی ڕووبەڕووبوونەوە و جەنگی حەوت مانگەی نێوان تاران و ئەمریکادا.
ڕۆژی سێشەممە دۆناڵد ترەمپ سەرۆکی ئەمریکا ڕایگەیاند، ئێران «بە شێوازێکی زۆر خراپ دووچاری شکست هاتووە»، پێشبینیی ئەوەشی دووپات کردەوە کە جەنگەکە «زۆر زۆر بە خێرایی» کۆتایی دێت.&nbsp;
ئەمەش لە کاتێکدایە کە ترەمپ لە سەرەتای سەرهەڵدانی ململانێکەدا باسی لەوە کردبوو شەڕ تەنها چەند هەفتەیەک دەخایەنێت، بەڵام لە نوێترین لێدوانەکانیدا ئاماژەی بەوە داوە کە پێشبینی ناکات شەڕ پێش هەڵبژاردنە ناوەکییەکانی سێی مانگی تشرینی دووەمی ئەمریکا کۆتایی پێبێت.

دوایـــن زانــیــاریەکان لەبـارەی ناکۆکیەکانی ئەمریکاو ئێران 

لە میانی هەوڵە دیپلۆماسییەکانی نەتەوە یەکگرتووەکان بۆ ئاشتی، بۆردومانەکانی مۆسکۆ لە ئۆکرانیا هەشت قوربانیی لێکەوتەوە.
&nbsp;
لەگەڵ نوێبوونەوەی داواکارییە نێودەوڵەتییەکان بۆ کۆتاییهێنان بە جەنگ، لە هێرشێکی فڕۆکەی بێفڕۆکەوان و مووشەکەکانی سوپای ڕووسیادا بۆ سەر خاکی ئۆکرانیا، لە میانی ئەو هێرشەدا هەشت هاووڵاتیی مەدەنی کوژران، ئەمەش لە کاتێکدایە داگیرکارییەکانی مۆسکۆ ماوەی چوار ساڵ و نیوە بەردەوامە.
&nbsp;ئیهۆر ڤیهیڤسکی، وەزیری ناوخۆی ئۆکرانیا ڕایگەیاند، هێرشێک بۆ سەر پارێزگای خارکیڤ لە باکووری ڕۆژهەڵاتی وڵات، بووە هۆی کوژرانی شەش کرێکاری کەرتی کشتوکاڵ و برینداربوونی ١٢ کەسی دیکە.&nbsp;
هاوکات لە کیێڤی پایتەختدا لە هێرشێکی دیکەدا گیانلەدەستدانی پیاوێک و ژنێکی لێکەوتەوە، لە شاری بەندەریی ئۆدیساش لە باشووری وڵات بۆردومانێکی چڕ تۆمار کراوە.&nbsp;
لە بەرامبەردا، ڤۆلۆدیمیر زێلینسکی، سەرۆکی ئۆکرانیا لە وتارێکدا لە کۆمەڵەی گشتیی نەتەوە یەکگرتووەکان داوای لە کۆمەڵگەی نێودەوڵەتی کرد لە ڕێگەی سەپاندنی سزای ئابووری و قەدەغەکردنی بازرگانییەوە سەرچاوەی داهاتەکانی ڕووسیا وشک بکەن، تا دەسەڵاتدارانی مۆسکۆ لەو پارەیە بێبەش بکرێن کە بۆ درێژەدان بە جەنگ بەکاری دەهێنن.
ئەمەش بەردەوامیی ئەو گوشارانەیە کە سەرکردەکانی جیهان بۆ پاشەکشەپێکردن بە خواستەکانی ڕووسیا لە نەتەوە یەکگرتووەکان دەیگرنەبەر.
&nbsp;سەرەڕای هەوڵە دیپلۆماسییە چڕەکانی چەند ساڵی ڕابردوو، هیچ ئاماژەیەکی ڕوون بۆ دەرچوون لە چەقبەستوویی ئەم جەنگە لە ئارادا نییە، ئەو جەنگەی کە پاشکەوتە و کاریگەرییە نەرێنییەکانی گەیشتووەتە سەر ئاسایشی خۆراک و وزەی جیهان، ئەمەش پەیوەندییەکانی نێوان مۆسکۆ و وڵاتانی ڕۆژئاوای بە تەواوی ئاڵۆز کردووە.&nbsp;
لە ڕووی هەڵوێستە سیاسییەکانیشەوە، لە دوای داواکارییەکەی ئۆکرانیا بۆ ڕاگەیاندنی ئاگربەستێکی سەرتاسەری و بێمەرج، دمیتری پێسکۆڤ، وتەبێژی کۆشکی سەرۆکایەتیی ڕووسیا (کرێملین) پێداگریی وڵاتەکەی دووپات کردەوە و ڕایگەیاند کە ئەوان تەنها پێشوازی لە ڕێککەوتنێکی ئاشتیی هەمەلایەنە دەکەن، نەک تەنها ڕاگرتنێکی کاتی لە شەڕ و پێکدادانەکاندا.
دمیتری پێسکۆڤ، وتەبێژی کۆشکی سەرۆکایەتیی ڕووسیا لە لێدوانێکدا بۆ ڕۆژنامەنووسان ڕایگەیاند:" ئێمە پێمانوایە کە پێویستە بەدوای ئاشتیدا بگەڕێین، نەک ئاگربەستێکی کاتی"، ئەمەش لە کاتێکدایە کە مەرجەکانی مۆسکۆ بەتایبەت دەستبەرداربوونی ئۆکرانیا لە خاکەکەی، لە لایەن دەسەڵاتدارانی کیێڤەوە بە تەواوی ڕەتکراوەتەوە.&nbsp;
ئەمەش لەکاتێکدایە، لە چەند مانگی ڕابردوودا جەنگی ئاسمانیی نێوان هەردوو وڵات گەیشتووەتە ئاستێکی نوێ، ڕووسیا بە بەردەوامی بە مووشەکی کرووز، بالیستیک، بۆمبی بەهێزی زیرەکی هەڵفڕیو و فڕۆکەی بێفڕۆکەوانی بە بزوێنەری جێت هێرش دەکاتە سەر ئۆکرانیا، لە بەرامبەریشدا فڕۆکە بێفڕۆکەوانە دوورمەوداکانی ئۆکراینا پاڵاوگەکانی نەوت و ئەو دامەزراوە ئابوورییانە دەکەنە ئامانج کە بڕبڕەی پشتی داهاتی مۆسکۆ پێکدەهێنن.
لەگەڵ ئەوەشدا، لەسەر زەمین و لە درێژایی هێڵی پێشەوەی بەرەکانی شەڕ لە ڕۆژهەڵات و باشووری ئۆکرانیا کە نزیکەی هەزار و 250 کیلۆمەتر درێژ دەبێتەوە، لە ساڵی ڕابردووەوە هیچ گۆڕانکارییەکی گەورە لە نەخشەی مەیدانیدا ڕووی نەداوە، چونکە بەکارهێنانی ژمارەیەکی زۆر و بێشوماری فڕۆکەی بێفڕۆکەوان لە لایەن هەردوولاوە، جموجۆڵی سەربازیی بە تەواوی سنووردار و قورس کردووە.

بەهۆی بۆردومانەکانەوە هەشت کەس کوژران

سەرۆکوەزیرانی عێراق: 30ـی ئەیلوول وەک دوا وادە دادەنێێن بۆ کۆتاییهێنان بە ئەرکی سەربازیی هاوپەیمانیی نێودەوڵەتی بە ڕابەرایەتیی ئەمریکا و کشانەوەی تەواوەتیی هێزەکانیان لە عێراق، وادەیەکی نەگۆڕ و یەکلاکەرەوەیە&nbsp;

نووسینگەی سەرۆکوەزیرانی عێراق لە تۆڕی کۆمەڵایەتیی ئێکس رایگەیاند، ئەم لێدوانانەی سەرۆکوەزیران لە ڕۆژی چوارشەممە و لە دوای کۆبوونەوەی ناوبراو هاتووە لەگەڵ ژەنەڕاڵ "براد کوپەر"،فەرماندەی سێتکۆم (فەرماندەییی ناوەندیی هێزەکانی ئەمریکا).

هاوکات، کشانەوەی ئەم هێزانە بە مانای کۆتاییهاتنی ئەو بوونە سەربازییە دێت کە لە ساڵی 2003ـوە بە هێرشی هاوپەیمانان و بە ڕابەرایەتیی ئەمریکا بۆ سەر ڕژێمی سەدام حوسێن دەستی پێکرد، پێشتریش لە ساڵی 2024، واشنتن و بەغدا ڕێککەوتبوون لەسەر قۆناغ بە قۆناغی کەمکردنەوە و کۆتاییهێنان بە ئۆپەراسیۆنە سەربازییە بەرتەسکترەکانی هاوپەیمانان دژی گرووپی چەکداریی داعش.

&nbsp;لە ڕاگەیەندراوەکەشدا هاتووە،٣٠ی ئەیلوول وادەی نەگۆڕ و کۆتایی دەبێت بۆ تەواوبوونی ئەرکی سەربازیی هاوپەیمانیی نێودەوڵەتی دژی داعش لە عێراق و کۆتاییهێنان بە چوونەدەرەوەی سەرجەم هێزەکانیان.
ئاماژەی بەوەشکردووە: (1ـی تشرینی یەکەم وەرچەرخانێکی نوێ دەبێت لە مێژووی عێراقدا، چونکە وڵاتەکە لە هەر بوونێکی سەربازیی بیانی پاک دەبێتەوە.&nbsp;
ئەمەش لەکاتێکدایە، لە بەیاننامەکەدا جەخت لەوە کراوەتەوە کە خستنەژێردەستی تەواوی چەک لەژێر کۆنترۆڵی دەوڵەتدا، مەرجێکی سەرەکی و بنەڕەتییە بۆ هەنگاونانی عێراق بەرەو قۆناغێکی نوێی گەشەپێدان و ئاوەدانی.&nbsp;


هەریەکە لە زەیدی و کوپەر جەختیان لەوە کردووەتەوە کە پەیوەندییەکانی نێوان عێراق و ویلایەتە یەکگرتووەکانی ئەمریکا دەچێتە قۆناغێکی نوێوە بۆ هاوکاریی ئابووری و ئەمنی لەسەر بنەمای ڕێزگرتن لە سەروەریی خاکی هەردوولا و بەرژەوەندییە هاوبەشەکان.&nbsp;
بەرپرسێکی ئەمریکی بە ئاژانسی ئەسۆشیەیتد پرێسی ڕاگەیاندووە، ویلایەتە یەکگرتووەکانی ئەمریکا پێشبینی دەکات تاوەکو 30ـی ئەیلوول کشانەوەی هێزەکانی تەواو بکات، بەڵام ڕەتی کردەوە ژمارەی ئەو سەربازانە ئاشکرا بکات کە لە عێراق ماونەتەوە، یاخود شوێنی نوێی جێگیرکردنەوەیان دیاری بکات.&nbsp;
بەپێی ڕاپۆرتێکی ئاژانسی ئەسۆشیەیتد پرێس، ویلایەتە یەکگرتووەکانی ئەمریکا و عێراق و هاوبەشەکانی هاوپەیمانان سەرکەوتنی گەورەیان لە تێکشکاندنی داعشدا بەدەستهێناوە، لە ئێستاش بەدواوە هێزە ئەمنییەکانی عێراق بە هەماهەنگی پێشمەرگە و دامەزراوە ئەمنییەکانی دیکەی هەرێمی کوردستانیشەوە ڕابەرایەتیی بەرەنگاربوونەوەی تیرۆریستان لە عێراق دەکەن ساڵی ڕابردوو هێزەکانی ئەمریکا لە زۆربەی بنکە سەربازییەکانی ناوچەکانی تری عێراق کشانەوە، بەڵام لە هەرێمی کوردستان بوونی خۆیان پاراست.&nbsp;
لە دوای 28ـی شوبات و دەستپێکردنی جەنگی ئەمریکا و ئیسرائیل دژی ئێران، بنکەکانی ئەو هێزانە لە هەرێم بە بەردەوامی ڕووبەڕووی هێرش بوونەتەوە و لە ڕوانگەی مێژووییەوە، ئامادەیی سەربازیی ویلایەتە یەکگرتووەکانی ئەمریکا لە عێراق لە ساڵی 2007 و لە ترۆپکی ئۆپەراسیۆنەکانی ڕووبەڕووبوونەوەی چەکداراندا، گەیشتە زیاتر لە 170 هەزار سەرباز.&nbsp;
لە کانوونی یەکەمی 2011دا، دوا یەکەی هێزە شەڕکەرەکانی ئەمریکا خاکی عێراقیان بەجێهێشت. بەڵام لە ساڵی 2014 و لەگەڵ سەرهەڵدانی گرووپی داعش و کۆنترۆڵکردنی رووبەرێکی بەرفراوان لە خاکی عێراق و سووریا، لەسەر داواکاری و بانگهێشتی فەرمیی حکوومەتی عێراق، هێزەکانی ئەمریکا جارێکی دیکە گەڕانەوە و پاش ئەوەی داعش دەسەڵاتی بەسەر ئەو ناوچانەدا لەدەستدا کە کۆنترۆڵی کردبوون، ئۆپەراسیۆنە سەربازییە سەرەکییەکانی هاوپەیمانان لە ساڵی 2021 کۆتاییان پێهات.

 پێشبینی دەکرێت تاوەکو 30 ئەیلول هێزەکانی ئەمریکا بکشێنەوە

سەرۆکوەزیرانی عێراق: پڕۆسەی ڕادەستکردنی چەک لەلایەن گرووپە چەکدارەکانەوە زۆرەملێیە نەک ئارەزوومەندانە، هەر گرووپێک لە دوای وادەی دیاریکراو بەردەوام بێت، بە دەرچوو لە یاسا هەژمار دەکرێت.
 
ئەمڕۆ سێشەممە 22ـی ئەیلوولی 2026، عەلی فالح زەیدی سەرۆکوەزیرانی عێراق، لە چاوپێکەوتنێکدا لەگەڵ ڕۆژنامەی (نیویۆرک تایمز)ـی ئەمریکی رایگەیاند، پڕۆسەی کۆنتڕۆڵکردنی چەک بە پێدانی مۆڵەتێکی (90) ڕۆژە دەستپێدەکات، کە تێیدا گرووپە چەکدارەکان و ویلایەتە یەکگرتووەکانی ئەمریکا هێرشەکانیان بۆ سەر یەکتر ڕادەگرن.
 
ئاماژەی بەوەشکرد، گرووپە چەکدارەکان دەستدەکەن بە ڕادەستکردنی چەکەکانیان و مەرجیشە پڕۆسەکە تاوەکو (30)ـی حوزەیرانی ساڵی داهاتوو (2027) بەتەواوی کۆتایی پێبێت.
 
هاوکات، لە بەشێکی دیکەی چاوپێکەوتنەکەدا، عەلی فالح زەیدی ڕوونیکردووەتەوە کە عێراق بەهۆی جەنگەوە سەدا 60ـی داهاتی مانگانەی نەوتی لەدەستداوە، هەر بۆیە کۆنتڕۆڵکردنی چەک بە مەرجێکی سەرەکی دەزانێت بۆ بنیاتنانی ئابوورییەکی بەهێز و دروستکردنی پەیوەندیی ئابووریی لەگەڵ وڵاتانی جیهاندا.&nbsp;&nbsp;&nbsp;

رادەستکردنی چەک زۆرەملێیە نەک ئارەزوومەندانە

سەرۆکی پەرلەمانی ئێران: ڕەخنەی توندی لەو لایەنانە دەگرین کە وڵاتەکەمان بەرەو "جەنگێکی بێکۆتا" دەبەن و تاران لە ڕێگەی نێوەندگیرەکانەوە پەیام و مەرجەکانی خۆی ئاراستەی ئەمەریکا کردووە.
ئەمڕۆ یەکشەممە 20ـی ئەیلوولی 2026، محەمەد باقر قالیباف سەرۆکی پەرلەمانی ئێران، لە وتارێکدا لە پەرلەمانی ئێران ڕایگەیاند، هەندێک لایەن باس لە جەنگ دەکەن بێ ئەوەی هیچ ئاسۆ و میکانیزمێکیان بۆ کۆتاییهێنانێکی بەهێز پێبێت.&nbsp;
ئاماژەی بەوەشکرد، ئەم جۆرە تێڕوانینە کە هەر جۆرە گفتوگۆ و دیپلۆماسییەک ڕەتدەکاتەوە بێ لەبەرچاوگرتنی تواناکان، وڵات بەرەو داڕمان و جەنگێکی بێکۆتا دەبات و دەڵێت:" پێویستە هەم بجەنگین و هەم دانوستان بکەین".&nbsp;
دەشڵێت، پەیام و مەرجەکانیان بەڕوونی لە ڕێگەی نێوەندگیرەکانەوە گەیاندووەتە بەرامبەرەکەیان و هۆشداریشیدا کە تا مەرجە پێشوەختەکانی ئێران جێبەجێ نەکرێن، هیچ دەروازەیەک نییە بۆ گەڕانەوە بۆ دۆخی پێشووی دانوستانەکان و کردنەوەی گەرووی هورمز. ئەمەش لەکاتێکدایە،&nbsp;
ڕۆژی ڕابردوو موحسین ڕەزایی، سکرتێری ئەنجومەنی باڵای ئاسایشی نەتەوەیی ئێران ڕایگەیاندبوو، تاران لە ڕێگەی نێوەندگیرەکانی قەتەر و پاکستانەوە مەرجەکانی خۆی بۆ دانوستان گەیاندووەتە ئەمەریکا و لە ئێستادا "چاوەڕوانی وەڵامی ترەمپ" دەکەن.&nbsp;

نە دانوستان دەکەین نە گەرووی هورمز دەکەینەوە

سێنتکۆم: گەرووی هورمز لە مین پاک کرایەوە و هاتوچۆی کەشتییەکان ئاساییە.

ئەمڕۆ شەممە 19ـی ئەیلوولی 2026، فەرماندەییی ناوەندیی هێزەکانی ئەمریکا (سێنتکۆم) ڕایگەیاند، کە ڕێڕەوە سەرەکییەکانی پەڕینەوە لە گەرووی هورمز بە تەواوی لە مین پاک کراونەتەوە و تا ئێستاش هەزاران کەشتی بە سەلامەتی بەو گەرووە گرنگەدا تێپەڕیون.

ئاماژەی بەوەشکرد، کە لە ئێستادا لە هەماهەنگی و کارکردنی بەردەوامدایە لەگەڵ وڵاتانی ناوچەی کەنداو، کۆمپانیاکانی کەشتیوانی و کۆمپانیاکانی دڵنیایی .

هاوکات، ئامانج لەم هەماهەنگی و هەنگاوانە، زامنکردنی زیاتری ئاسایشی دەریایی و بەرزکردنەوەی قەبارە و ڕەوتی هاتوچۆی کەشتییەکانە لە گەرووی هورمزدا.

گەرووی هورمز لە مین پاک کرایەوە

وەزارەتی گەنجینەی ئەمریکا: لە چوارچێوەی ئۆپەراسیۆنی گۆشەگیرکردنی ئابووری ئێراندا، سزایان بەسەر سێ دامەزراوەی دیکەدا سەپاندووە کە پەیوەندیی ئابوورییان لەگەڵ ئێران هەبووە.
بەگوێرەی ڕاگەیەندراوەکەی وەزارەتی گەنجینەی ئەمریکا، شادەماری پەیوەندی ئابووری نێوان ئێران و سێ بانکیان لەناو تورکیا بڕیوە کە تۆمەتبارن بە گواستنەوەی پارە بۆ ئێران.

 روونیشیکردووەتەوە، لە رێگەی مامەڵەی تاکەکەسی و کۆمپانیاوە ئەو بانکانە مامەڵەی بازرگانیان لەگەڵ تاران هەبووە.
هاوکات، سزاکان هەریەک لە بانکەکانی گۆڵدن گڵۆباڵ، یاتیرم بانکاسی و ئەنۆنیم شیرکەتی دەگرێتەوە، کە هەرسێکیان لە ناو خاکی تورکیادا کار دەکەن.
ئەمەش لەکاتێکدایە، پێشتر سکۆت بێسێنت لە رێگەی هەژماری فەرمی خۆی لە پلاتفۆرمی "ئێکس" نووسیبووی: "یەکێتی ئەوروپا بە فەرمی چووەتە ناو ئۆپەراسیۆنی دابڕاندنی ئابووری و ئێمەش دەستخۆشی لەو هەڵوێستە بەهێز و پێشوەختەیان دەکەین".

ئەمریکا سزای بەسەر سێ بانکی تورکیدا سەپاند

لە ناوچە ئاوییەکانی دەریای مەڕمەڕە لە ئەستەنبول، دوو کەشتیی بارهەڵگر خۆیان بەیەکتردا کێشا و بە هۆیەوە پەیوەندی لەگەڵ کەشتییەکە و ئەو 10 کارمەندەی تیمی کەشتیوانی کە لەوێدان پچرا.


پارێزگای ئەستونبوڵ ڕایگەیاند، ڕووداوەکە دەوروبەری کاتژمێر سێی بەرەبەیان لە دووریی 18 میل لە کەناراوەکانی ناوچەی سیلیڤری ڕووی داوە و بەهۆی ڕووداوەکەوە چارەنووسی یەکێک لە کەشتییەکان و 10 کارمەندەکەی دیکە بە نادیاری ماوەتەوە.


ئاماژەی بەوەشکردووە، تیمەکانی پاسەوانی کەناراوەکان و فریاکەوتنی دەریایی بە هەلیکۆپتەر و بەلەمی خێرا بەردەوامن لە گەڕان لە دەریای مەڕمەڕە بۆ دۆزینەوەی ئەو 10 کارمەندە.

هاوکات، ئەو ناوچەیە قەرەباڵغییەکی زۆری کەشتیوانیی تێدایە و ئەو کەشتییی زیانی پێگەشتووە دروستکراوی ساڵی 1990ـیە و تەمەنی 36 ساڵە، لەوانەیە بەهۆی کۆنییەکەی و هەڵەی مرۆیی ژێر ئاو بکەوێت.

سینەمای قەلەم

گەڕان بکە بۆ نوێترین فیلم و دراما جیهانیەکان لە سینەمای قەڵەم بە زمانی کوردی و بیانی

جیهان