وەزارەتی دارایی، دابەشکردنی مووچەی مامۆستایانی گرێبەست و بەشێک لە فەرمانبەرانی هەمیشەیی و گرێبەست رادەگەیەنێت.
ئەمڕۆ پێنجشەممە، 18-6-2026، وەزارەتی دارایی و ئابووری هەرێم لە بڵاوکراوەیەکدا رایگەیاند، (رۆژی یەکشەممە،21ـی حوزەیران تا رۆژی پێنجشەممە، 25ـی حوزەیرانی 2026) مووچەی مانگی ئایاری مامۆستایانی گرێبەستی وەزارەتی پەروەردە و خوێندنی باڵا و توێژینەوەی زانستی و سەرجەم ئەو فەرمانبەرانە دابەش دەکرێت کە گرێبەستن و تەمویلیان لەسەر داهاتی ناوخۆیە.
ئاماژەی بەوەشکرد، مووچەی مانگی ئایاری سەرجەم ئەو فەرمانبەرانەش دابەش دەکرێت کە لەدوای (1-7-2024) بەشێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون، کە شایستەکانیان لەسەر داهاتی ناوخۆی هەرێمی کوردستان خەرج دەکرێت.

مووچەی مامۆستایانی گرێبەست دابەشدەکرێت

نرخی زێڕ لە بازاڕەکانی جیهان و هەرێم دابەزی و لە ئێستادا نرخی ئۆنسەیەک زێڕ بە زیاتر لە 4212 دۆلار مامەڵەی پێوەدەکرێت.
ئەمڕۆ چوارشەممە، 10-6-2026، لەسەر ئاستی جیهان و هەرێم نرخی ئۆنسەیەک زێڕ دابەزی و بە چوار هەزار و 212 دۆلار و حەوت سەنت مامەڵەی پێوەدەکرێت.
نرخی ئێستای زێڕ لە بازاڕەکانی هەرێم بەم شێوەیەیە:-

یەک مسقاڵ زێڕی عەیارە 18 بە 782 هەزار دینارە. 

یەک مسقاڵ زێڕی عەیارە 21 بە 912 هەزار دینارە.

یەک مسقاڵ زێڕی عەیارە 22 بە 955 هەزار دینارە. 

یەک مسقاڵ زێڕی عەیارە 24 بە ملیۆنێک و 42 هەزار دینارە.

نرخی زێڕ دابەزی

وەزارەتی دارایی هەرێم رایگەیاند، حکومەتی عێراق مووچەی هەردوو مانگی تشرینی دووەم و کانوونی یەکەمی خەرج نەکردووە، لەکاتێکدا مووچەی تەواوی دامەزراوەکانی دیکەی عێراق لەو دوو مانگەدا دابەشکراوە.
ئەمڕۆ سێشەممە، 9-6-2026، لە روونکردنەوەیەکدا بەڕێوەبەرایەتیی گشتیی ژمێریاریی وەزارەتی دارایی هەرێم رایگەیاند، لە وەڵامی لێدوانەکانی عەدنان فەیحان دلێمی، جێگری یەکەمی سەرۆکی پەرلەمانی عێراق کە داوای راگرتنی شایستە داراییەکانی هەرێم دەکات تا یەکلاییکردنەوەی سەرجەم کێشەکان، دووپاتی دەکەنەوە کە هەولێر بەپێی یاسای ئیدارەی دارایی و یاسای بودجەی فیدراڵی بۆ ساڵەکانی (2023، 2024، 2025) سەرجەم ئەرکەکانی بە تەواوی جێبەجێکردووە.
لە راگەیەندراوەکەدا ئاماژە بەوە کراوە، لە ساڵی 2025دا هەرێم پشکی گەنجینەی فیدراڵیی بەپێی رێککەوتنەکان رادەستکردووە، بەڵام حکومەتی عێراق تەنیا پارەی مووچەی 10 مانگی فەرمانبەرانی هەرێمی ناردووە و مووچەی هەردوو مانگی تشرینی دووەم و کانوونی یەکەمی خەرج نەکردووە، لەکاتێکدا مووچەی تەواوی دامەزراوەکانی دیکەی عێراق لەو دوو مانگەدا دابەشکراوە.
وەزارەتی دارایی روونیشیکردووەتەوە، بۆ ساڵی 2026، بەپێی رێککەوتنەکان هەرێم پشکی بەغدای لە داهاتە نانەوتییەکانی مانگەکانی کانوونی دووەم، شوبات، ئازار، نیسان و ئایار رادەستکردووە. سەبارەت بە کەمبوونەوەی داهاتەکانیش لە هەردوو مانگی ئازار و نیسان، وەزارەتەکە هۆکارەکەی بۆ دۆخی جەنگ لە ناوچەکە و نەگەیشتن بە رێککەوتن لەسەر جێبەجێکردنی سیستەمی "ئەسیکودا" لە دەروازە سنوورییەکان گەڕاندووەتەوە، کە وەک ئامرازێک بۆ سەپاندنی گەمارۆی ئابووری بەسەر هەرێمدا بەکارهێنراوە. سەرەڕای ئەوەی گفتوگۆکانی تایبەت بەو سیستەمە گەیشتبوونە قۆناغی کۆتایی، بەڵام بەغدا لە دەرکردنی بڕیاری پێویست کەمتەرخەمی کردووە، بۆیە بەپێی رێککەوتنێک، بڕیاردراوە تەنیا 50٪ی داهاتە نانەوتییەکان رادەست بکرێت بەهۆی دابەزینی قەبارەی داهاتەکانەوە.
لە کۆتایی راگەیەندراوەکەشدا هاتووە، وەزارەتی دارایی رەخنەی توند لە جێگری یەکەمی سەرۆکی پەرلەمان دەگرێت و ئاشکرای دەکات کە باشتر بوو ناوبراو هەوڵی دۆزینەوەی چارەسەری یاسایی و دەستووری بۆ کێشەی بڕگەی "خەرجیی فیعلی" بدایە کە بەشێوەیەکی نادادپەروەرانە و تەنیا بەسەر هەرێمی کوردستاندا جێبەجێ دەکرێت، کە بووەتە هۆی خەرجنەکردنی تەواوەتی شایستە داراییەکان و مووچە. هەروەها دەڵێت: "جێگەی سەرسوڕمانە کەسایەتییەک لەو پۆستەدا، لەبری پاراستنی یەکسانی و مافی سەرجەم هاووڵاتییان، داوای بڕین و راگرتنی مووچەی بەشێکی دیاریکراو لە هاوڵاتییانی وڵات بکات."

دارایی هەرێم: بەغدا مووچەی دوو مانگی هەرێمی خەرج نەکردووە

نوێنەری فەرمانبەرانی گرێبەستی خوێندنی باڵا رایگەیاند، لەم هەفتەیەدا مووچەی مامۆستایان و فەرمانبەرانی گرێبەست خەرج دەکرێت. 
ئەمڕۆ شەممە، 30-5-2026، محەممەد نەجیب، نوێنەری فەرمانبەرانی گرێبەستی خوێندنی باڵا لە لێدوانێکدا رایگەیاند، لەم هەفتەیەدا مووچەی مامۆستایان و فەرمانبەرانی گرێبەست خەرج دەکرێت و بڕیارە سبەینێ یەکشەممە وەزارەتی دارایی خشتەی فەرمی رابگەیەنێت.
ئاماژەی بەوەشکرد، ئەگەر سبەینێ کاتی دابەشکردنەکە ئاشکرا نەکرێت، ئەوا پرۆسەکە زیاتر دوا دەکەوێت.

مووچەی مامۆستایانی گرێبەست خەرج دەکرێت

وەزارەتی دارایی و ئابوریی هەرێم راگەیەندراوێکی لەبارەی کات و شێوازی دابەشکردنی مووچەی مانگی پێنج بڵاوکردەوە.
دەقی راگەیەندراوەکە:
دوای ناردنی لیستی مووچەی مانگی ئایار و راپۆرتی تەرازووی پێداچوونەوەی مانگی نیسان بۆ وەزارەتی دارایی عێراق لە کۆتایی هەفتەی رابردوو، لە پێناو ئەوەی هەرچی زووە مووچەی مانگی ئایار بنێردرێت و بەر لە جەژن دابەشبکرێت، سەرلەبەیانی رۆژی دووشەممە، 25-5-2026، وەک وەزارەتی دارایی و ئابووری بڕی (50،000،000،000) پەنجا ملیار دینارمان وەک نیوەی داهاتی نانەوتی بۆ مانگی ئایار بە نوسراوی ژمارە (5477،4،7) کە لە رۆژی (24-5-2026 ) واژۆکراوە خستە سەر هەژماری بانکی وەزارەتی دارایی حکومەتی فیدراڵ بە ژمارە (70018) لە لقی هەولێری بانکی ناوەندی عێراق.
کە ئەوەش لە هیچ سیستەمێکی ژمێریاری دنیادا نەبووە هێشتا مانگەکە شەش رۆژی ماوە بۆ کۆتایی، بەڵام وەزارەتی دارایی فیدراڵ داوای نیوەی داهاتی ئەو مانگە بکات، لە بەرامبەریشدا وەزارەتی دارایی هەرێمی کوردستان بۆ نەهێشتنی هیچ بیانویەک ئامادەبوو ئەو بڕە داهاتە پێش وادەی خۆی رەوانە بکات.
سەرەڕای هەموو ئەو رێوشوێن و رێکارانە وەزارەتی دارایی حکومەتی فیدراڵ لە کۆی بڕی (970،741،514،914) نۆسەدو حەفتا ملیارو حەوت سەدو چل و یەک ملیۆن و پێنج سەدو چواردە هەزارو نۆسەدو چواردە دینار، لە کاتی کۆتاییهاتنی دەوامی فەرمی بانکی ناوەندی عێراق و لە کاتژمێر سێی دوانیوەڕۆ بڕی تەنیا (890،502،000،000) هەشت سەدو نەوەد ملیارو پێنج سەدو دوو ملیۆن دینار لەلایەن وەزارەتی دارایی حکومەتی فیدراڵەوە گەیشتووەتە سەر هەژماری بانکی وەزارەتمان لە لقی هەولێری بانکی ناوەندی عێراق، بەوەش دەردەکەوێت کە وەزارەتی دارایی حکومەتی فیدراڵ زیاتر لە (80،000،000،000) هەشتا ملیار دینار کەمتری لە کۆی تەمویلی مووچەی مانگی ئایاری فەرمانبەران و مووچەخۆرانی هەرێمی کوردستان ناردووە.
هەروەها، سەرەڕای نەبوونی دەوامی فەرمی و پشوو لە عێراق و هەرێمی کوردستان لەپێناو هەرچی زوو دابەشکردنی مووچەی فەرمانبەران و مووچەخۆرانی هەرێمی کوردستان، وەزارەتی دارایی سەرجەم بانک و گەنجینە و بەڕێوبەرایەتییەکانی راسپاردووە کە دوای وەرگرتنی پارەکە بەشێوەی کاش لە لقی هەولێری بانکی ناوەندی عێراق و گواستنەوە بۆ بانکە ئەهلیەکانی ناو پرۆژەی هەژماری من و پارێزگاو ئیدارە سەربەخۆکان هەر ئەمڕۆ دوای نیوەڕۆ دەست بە دابەشکردنی مووچە دەکرێت.
دوای راگەیاندنی لیستی مووچە دەست بە دابەشکردنی مووچە دەکرێت، لە رۆژانی جەژنیشدا دابەشکردنی مووچە لەدوای کاتژمێر (10)ـی بەیانیەوە بەشێوەی کاش و لە رێگای هەژماری من بەردەوام دەبێت.
بەهۆی ئەوەی گواستنەوەی پارە لە هەولێرەوە بۆ پارێزگاو ئیدارە سەربەخۆکان و شارو قەزاکان پێویستی بە کاتە، بۆیە داوا لە سەرجەم ئەو مووچەخۆرانە دەکەین کە لە خشتەی مووچەدا مووچەکانیان دەکەوێتە ئەمڕۆ کە بەشێوەی کاش مووچە وەردەگرن لە کاتژمێر پێنجی ئێوارە بەدواوە سەردانی بانکەکان بکەن و ئەو مووچەخۆرانەشی لە رێی هەژماری منەوە مووچە وەردەگرن لە کاتژمێر سێ بەدواوە دەتوانن سەردانی ئامێرەکانی راکێشانی پارە (ATM) ـەکان بکەن و مووچەکانیان رابکێشن، هەر فەرمانبەر و مووچەخۆرێکیش نەتوانێت لەماوەی ئەو سێ رۆژە مووچەکەی وەربگرێت دەتوانێت سەرەتای هەفتەی داهاتوو لەگەڵ دەستپێکردنەوەی دەوام مووچەکەی وەربگرێت.
تێبینی/ لەپێناو ئەوەی بەرە جەژنانە و تا سەرجەم مووچەخۆران بتوانن شایستەکانیان لەکاتی خۆیدا وەربگرن و هیچ مووچە خۆرێک بێبەش نەبێت لە وەرگرتن و دواکەوتنی مووچەکەی، وەک وەزارەتی دارایی بڕیارماندا ئەو کورتهێنانەی بۆ مووچە دروست بووە لەڕێی وەرگرتنی قەرزەوە پڕ بکەینەوە.
هاوپێچ نوسراوی ژمارە (5477،4،7).
راگەیاندنی وەزارەتی دارایی و ئابووریی هەرێم
26ـی ئایاری 2026

راگەیەندراوێک لە وەزارەتی داراییەوە

ئەمڕۆ ئەم شوێنانە مووچە وەردەگرن

وەزارەتی دارایی رایگەیاند، داهاتی نانەوتی هەرێم بۆ مانگی ئایار خرایە سەر هەژماری بانکی وەزارەتی دارایی عێراق.
وەزارەتی دارایی و ئابووری هەرێم لە بڵاوکراوەیەکدا رایگەیاند، ئەمڕۆ دووشەممە، رێکەوتی 25-5-2026، لەسەر بڕیاری وەزارەتی دارایی و ئابووری هەرێمی کوردستان، بڕی (50،000،000،000) پەنجا ملیار دینار وەک داهاتی نانەوتی هەرێم بۆ مانگی ئایار بەشێوەی کاش خرایە سەر هەژماری بانکی وەزارەتی دارایی حکومەتی فیدراڵ لە لقی هەولێری بانکی ناوەندی عێراق.

داهاتی نانەوتی رادەستی بەغدا کرا

بەپێی لیستی مووچە، بڕیارە چەند وەزارەت و دەستەیەک مووچەی مانگی نیسان وەربگرن.
بەپێی لیستی مووچەی مانگی چوار، ئەمڕۆ پێنجشەممە، 14-5-2026، چەند وەزارەت و دەستەیەکی دیکە مووچەی مانگی نیسان وەردەگرن.
هەر بەپێی لیستی مووچەی مانگی چوار، ئەمڕۆ هەریەکە لە خانەنشینیی پێشمەرگە، خاوەن پێداویستیی تایبەت، مافی مرۆڤ، دەستەی دەستپاکی، دەستەی وەبەرهێنان، دەستەی ژینگە، دەزگای مین، ناوچەکانی دەرەوەی هەرێمی کوردستان، کۆمسیۆنی باڵای هەڵبژاردن، دیوانی چاودێریی دارایی، کاروباری شەهیدان و ئەنفالکراوان، ئاوەدانکردنەوە و نیشتەجێکردن، دارایی و ئابووری، ناوخۆ، داد، ئەنجومەنی دادوەری، پلاندانان، بازرگانی و پیشەسازی، کشتوکاڵ و سەرچاوەکانی ئاو، شارەوانی و گەشتوگوزار، کار و کاروباری کۆمەڵایەتی، رۆشنبیریی و لاوان، کارەبا، ئەوقاف و کاروباری ئایینی، فەرماندەیی بەرگریی فریاکەوتن و هێزی زێرەڤانی، سەرۆکایەتیی پەرلەمان، سەرۆکایەتیی ئەنجومەنی وەزیران و سەرۆکایەتیی هەرێمی کوردستان مووچە وەردەگرن.
هەروەها، رۆژی شەممەش دابەشکردنی مووچەی مانگی نیسان کۆتایی دێت.

بەپێی لیستی مووچەی مانگی چوار، دابەشکردنی مووچە لە ئەمڕۆوە دەستپێدەکات و رۆژی شەممە، 16ـی ئایار کۆتایی دێت.
بەپێی لیستی مووچەی مانگی چوار، ئەمڕۆ چوارشەممە 13-5-2026، دەست بە دابەشکردنی مووچەی مانگی نیسانی مووچەخۆران دەکرێت و رۆژی شەممە، 16ـی ئایار کۆتایی دێت.
هەر بەپێی لیستی مووچەی مانگی چوار، ئەمڕۆ چوارشەممە، هەریەکە لە (خانەنشینانی شارستانی، زیندانییانی سیاسی، بەرکەوتووانی کیمیاباران، کەسوکاری شەهیدان و ئەنفالکراوان، خوێندنی باڵا و توێژینەوەی زانستی، پەروەردە و تەندروستی) مووچە وەردەگرن.

لە بازاڕەکانی هەرێم و جیهاندا نرخی زێڕ بەرزبووە و نرخی یەک ئۆنسە زێڕ بەرزبووەوە بۆ چوار هەزار و 715 دۆلار مامەڵەی پێوە دەکرێت
 


ئەمڕۆ یەکشەممە 10ـی ئایاری 2026، نرخی یەک ئۆنسە زێڕ بەرزبووەوە بۆ چوار هەزار و 715 دۆلار، نرخی یەک مسقاڵ زێڕی عەیارە 21ـیش یەک ملیۆن و حەوت هەزار دینار مامەڵەی پێوەدەکرێت.

نرخی هەر مسقاڵێک زێڕ لە بازاڕەکانی هەرێم بەم شێوەیەیە:

زێڕی عەیارە 18: 863 هەزار دینار
زێڕی عەیارە 21: یەک ملیۆن و حەوت هەزار دینار
زێڕی عەیارە 22: یەک ملیۆن و 55 هەزار دینار
زێڕی عەیارە 24: یەک ملیۆن و 151 هەزار دینار

نرخی ئەمڕۆی زێڕ

نرخی زێڕ دابەزی و لە ئێستادا نرخی یەک ئۆنسەی کانزاکە بە زیاتر لە 4540 دۆلار مامەڵەی پێوەدەکرێت.
ئەمڕۆ دووشەممە، 4-5-2026، نرخی یەک ئۆنسە زێڕ لە بازاڕەکانی جیهاندا دابەزی و بە چوار هەزار و 549 دۆلار و 31 سەنت مامەڵەی پێوەدەکرێت.
ئەمەش لە کاتێکدایە، لە ماوەی رابردوودا زێڕ نرخێکی پێوانەیی تۆمارکرد، ئێستا بازرگانان و بانکە گەورەکان بۆ بەدەستهێنانی قازانجی خێرا بڕێکی زۆر زێڕیان خستە بازاڕەوە، بەهۆی ئەم گۆڕانکارییانەوە لە بازاڕەکانی هەرێمی کوردستانیش نرخی هەر مسقاڵێک زێڕ بەراورد بە چەند رۆژی رابردوو دابەزی.

نرخی ئێستای زێڕ لە بازاڕەکانی هەرێم بەم شێوەیەیە:- 

یەک مسقاڵ زێڕی عەیارە 18 بە 834 هەزار دینارە.

یەک مسقاڵ زێڕی عەیارە 21 بە 984 هەزار دینارە.

یەک مسقاڵ زێڕی عەیارە 22 بە ملیۆنێک و 30 هەزار دینارە.

یەک مسقاڵ زێڕی عەیارە 24 بە ملیۆنێک و 125هەزار دینارە.

وەزارەتی پێشمەرگە رایگەیاند، هاوکاری دارایی هاوپەیمانان بۆ مانگی سێی ساڵی 2026 دابەشدەکرێت.
ئەمڕۆ یەکشەممە، 26-4-2026، وەزارەتی پێشمەرگە لە راگەیەندراوێکدا رایگەیاند، دوای ئەوەی هاوکاریی دارایی هاوپەیمانان بۆ مانگى (سێ) خرایە سەر هەژماری وەزارەتی پێشمەرگە، لەلایەن بەڕێوەبەرایەتى گشتى بوودجە و بەرنامەکان ژمێریارى سەربازى.
ئاشکراشیکرد، رێکارە دارایی و ژمێریارییەکان ئەنجامدراون بۆ ئەم مەبەستە ئەمڕۆ یەکشەممە 26ـی نیسانی 2026، دەست بە دابەشکردنی دەکرێت.

سینەمای قەلەم

گەڕان بکە بۆ نوێترین فیلم و دراما جیهانیەکان لە سینەمای قەڵەم بە زمانی کوردی و بیانی

ئابوری

مووچەی مامۆستایانی گرێبەست دابەشدەکرێت

نرخی زێڕ دابەزی

دارایی هەرێم: بەغدا مووچەی دوو مانگی هەرێمی خەرج نەکردووە

مووچەی مامۆستایانی گرێبەست خەرج دەکرێت

راگەیەندراوێک لە وەزارەتی داراییەوە

ئەمڕۆ ئەم شوێنانە مووچە وەردەگرن

داهاتی نانەوتی رادەستی بەغدا کرا

ئەمڕۆ ئەم شوێنانە مووچە وەردەگرن

ئەمڕۆ ئەم شوێنانە مووچە وەردەگرن

نرخی ئەمڕۆی زێڕ

نرخی زێڕ دابەزی

هاوکاری هاوپەیمانان دابەشدەکرێت