یەکێتی مامۆستایانی کوردستان و کۆمپانیایەکی ئۆتۆمبێل رێکەوتون بۆ پێدانی ئۆتۆمبێل بە مامۆستایان بەپێشەکی کەم و قیستی درێژخایەن، رێککەوتنەکەش لە ئێستادا چوەتە بواری جێبەجێکردنەوە و ئەو مامۆستایانەی مەرجەکان دەیانگرێتەوە، دەتوانن داواکاری پێشکەش بە لقەکانی یەکێتی مامۆستایان بکەن.

ئەمڕۆ پێنج شە ممە 16ـی شوباتی 2023 سەنگەر فایەق، جێگری سەرۆکی لقی سلێمانی یەکێتی مامۆستایانی کوردستان بە میدیاکانی راگەیاند: "رێککەوتنەکەیان لەگەڵ كۆمپانیای باجگر و بانکی جیهاندا واژۆکردوە بۆ ئەوەی مامۆستایان بتوانن ئۆتۆمبێلەكانی جۆری جێلیین (جۆری قەمەرەو ئۆتۆمبێلی بەرز) بەشێوەی قیست رابکێشن، کە نرخی ئۆتۆمبێلەکانیش لە کۆمپانیا 1000 دۆلار لە نرخی فرۆشتنی فەرمی هەرزانترن".

ئاماژەی بە ئەوەشکرد، ئەگەر کەسێک بیەوێت ئۆتۆمبێل بە قیست رابکێشێت ئەگەر نرخی ئۆتۆمبێلەکە لە 10 هەزار دۆلار زیاتر بێت، پێویست دەکات تاپۆی خانو دابنێت تا قیستەکانی تەواو دەکات، بەڵام لەو رێککەوتنەی کە یەکێتی مامۆستایان لەگەڵ كۆمپانیای باجگر و بانکی جیهاندا ئەنجامی داوە ئەگەر نرخی ئۆتۆمبێلەکان بگاتە 20 هەزار دۆلاریش، بۆ مامۆستایان تاپۆی ناوێت و تەنها دوو کەفیلی پێویست دەبێت.

بەگوێرەی رێککەوتنەکەی نێوان یەکێتی مامۆستایان و کۆمپانیاکە، مامۆستایانی لقی سلێمانی، هەولێر و دهۆک بەشێوەیەكی كاتی و بۆ ماوەی 3 مانگ ئۆتۆمبێلی هەرزانتر و بەشێوەی قەرز و قیست دەتوانن بکڕن، ماوەی قیستەکەش 5 ساڵ دەبێت، یەکێک لە مەرجەکانیش ئەوەیە مامۆستاکە موچەی لە یەك ملیۆن دینار كەمتر نەبێت و 2 مامۆستاش كەفیلی بن کە موچەی هەردووكیان پێكەوە لە یەك ملیۆن و 600 هەزار تاوەكو سەروی دو ملیۆن دینار بێت.

بە گوێرەی جۆر و نرخی ئۆتۆمبێلەکەش قیستەکان دەگۆڕێن، بە جۆرێک پێشەکی ئۆتۆمبێلەکان لە سێ هەزار تاوەکو 10 هەزار دۆلار دەبێت، قیستەکانیش مانگانە لە 280 دۆلار بۆ 420 دۆلار دەبێت.