بەشێک لە میدیاکان باس لە ئەوە دەکەن، پاش ئەوەی ئەمڕۆ مەلا مەزهەر خۆراسانی سەردانی سلێمانیی کرد و لەگەڵ بافڵ تاڵەبانی کۆبوەوە، بڕیاردراوە ئەو مامۆستا ئاینییە بێتە سلێمانی و لە مزگەوتێکی سلێمانییەوە دەست بە وتاردان بکاتەوە.

دوای ئەوەی ئەمڕۆ چوار شەممە 11ـی کانونی دووەمی 2023 مەلا مەزھەر خۆراسانی سەردانی شاری سلێمانی کرد و لەگەڵ ژمارەیەک مامۆستای ئاینی لەگەڵ بافڵ تاڵەبانی سەرۆکی یەکێتیی نیشتیمانیی کوردستان کۆبوەوە، بەشێک لە میدیاکان باسیان لە ئەوە کرد کە بڕیاردراوە مەلا مەزھەر بێتە سلێمانی و لە یەکێک لە مزگەوتەکانی شاری سلێمانییەوە بەردەوام بێت لە وتاردان.

لە ئەم بارەیەوە سەرچاوەیەکی سیاسیی ئاگادار ئەوەی خستەڕو، ھەوڵێک ھەیە بۆ ئەوەی مزگەوتێکی دیاری شاری سلێمانی بدرێتە مەلا مەزھەر و دوای 5 ساڵ دورکەوتنەوەی لە میمبەر جارێکی تر دەستبکاتەوە بە وتاردان.

لەلایەکی دیکەشەوە، سەرچاوەیەکی باڵا لە حکومەتی ھەرێمی کوردستان بە میدیاکانی ڕاگەیاند: "بە ھیچ جۆرێک ڕێگە بە کارێکی لە ئەم شێوەیە نادرێت و د.مەزھەر بە بڕیاری وەزارەتی ئەوقاف و حکومەتی ھەرێم دورخراوەتەوە و ناتوانێت جارێکی تر دەست بکاتەوە بە وتاردان".

ئەو سەرچاوەیە وتیشی: "ھەرکەسێک پشتیوانی بێت ىریارەکە جێبەجێ دەکرێت، چونکە ناوبراو لە ڕابردودا بەپێی ڕێنمایی و یاساکانی وەزارەتەکەی کاری نەکردووە".

ئەو سەرچاوەیە ئەوەشی ئاشکرا کرد، ئەو مامۆستا ئاینییانەی ئەمرۆ سەردانی بافڵ تاڵەبانی سەرۆکی یەکێتییان کردووە، بەشێکیان لە میمبەرەکان بە ھۆی سەرپێچی لە ڕێنماییەکاندا دورخراونەتەوە و مافی وتاردانیان نەماوە، "بۆیە دەبێت بەرپرسانی حزبی ئاگاداربن و پشتیوانیی کەسانێک نەکەن کە لەلایەن خودی وەزارەتەکەی خۆیانەوە سزادراون".