لۆر بیکیو، داواکاری گشتیی پاریس ڕایگەیاند، ئەوەی کە لێرە کرا تاوان و کوشتنە، توندوتیژییەکی ئاشکرابووە کە بە چەک ئەنجامدراوە.

ئەمڕۆ شەممە 24ـی کانونی یەکەمی 2022، داواکاری گشتیی پاریس دوای سەردانی بۆ شوێنی روداوەکەی هێرشکردنەسەر ناوەندی کولتوریی کوردیی رایگەیاند: "لە دوای ئەو کردە تاوانبارەی کە لێرە ئەنجامدرا، یەکەی تاوانەکانی پاریس ئەرکی لێکۆڵینەوەیان پێ راسپێردراوە لێکۆڵینەوەی ورد بکەن، چونکە ئەوەی ئەنجامدرا تاوان و کوشتنە".

رۆژی هەینی کەسێک بەناوی وڵیەم بە چەک هێرشی کردە سەر ناوەندی کولتوریی کوردیی ئەحمەد کایا، کە دەکەوێتە گەڕەکی 10ـی باکوری پاریس، لە ئەنجامدا میر پەروەر، هونەرمەندی خەڵکی ناوچەی گمگمی سەر بە پارێزگای موش، ئەمینە کارا، خەڵکی ناوچەی قلەبان سەر بە پارێزگای شرناخ و عەبدولڕەحمان قزل شەهید بوون.

عەگید پۆلات، وتەبێژی ئەنجومەنی دیموکراتی کورد لە فەرەنسا هێرشەکە بە تیرۆریستی ناودەبا.