تەندروستی سلێمانی چەند رێنماییەکی خۆپارێزی لە تای خوێنبەربوون لە کاتی قوربانیکردن بڵاوکردەوە؛ داواش دەکات، هاوڵاتییان پابەندبن.

بەڕێوبەرایەتی گشتی تەندروستی سلێمانی داوا لە هاوڵاتییان دەكات ئەم رێنماییە تەندروستی و زانستیانە لە كاتی سەربڕینی ئاژەڵ بۆ قوربانیکردن جێبەجێ بكەن، بۆ ئەوەی دووربن لە تووشبوون بە تای خوێنبەربوون، کە بریتین لە:-

1- سەربڕینی ئاژەڵ پێویستە لەناو ئەو سەربڕینخانانەدا بێت كە رێگە پێدراون و پزیشكی ڤێتێرنەری سەرپەرشتی دەكات.

2- لە كاتی سەربڕینی ئاژەڵ و كەوڵكردن یان پارچە پارچەكردنی گۆشتەكەی جل و بەرگی خۆپارێزی وەك (دەستكێش، جزمە، سەدریەی پلاستیك، ماسكی دەمووچاو) بەكاربهێنرێت.

3- نابێت خانەوادە یان خەڵك كۆببنەوە لە چواردەوری قەساب و نابێت هاوكاری بكەن لە كاتی سەربڕینی ئاژەڵ و پارچە پارچە كردنی گۆشتەكەی.

4- بەبێ دەستكێش مامەڵە لەگەڵ جەستەی ئاژەڵی سەربڕاو مەكە.

5- دوای پۆشینی دەستكێش و كەلوپەلی خۆپارێزی گۆشتی ئاژەڵی سەربڕاو پارچە پارچە بكە.

6- لابردنی پاشماوەی ئاژەڵە سەربڕاوەكان و دانانی لە كیسی داخراو فڕێدانی بۆ شوێنی تایبەت.

7- بەكارهێنانی چەقۆ و تەختەی پارچەپارچە كردنی تایبەت بە گۆشت و شتن و پاكژكردنەوەی تەختە و چەقۆكان دوای بەكارهێنانیان.

8- پاككردنەوەی ئەو شوێنەی ئاژەڵەكەی لێ سەردەبڕێت و بەتایبەت ئەو شوێنانەی خوێنی لێیە بە ماددەی كلۆریینی روونكراوە.

9- باشتر وایە گۆشت ماوەی 12 بۆ 24 كاتژمێر لەناو ساردكەرەوە هەڵبگیرێت پاشان بەكاربهێنریت، بەڵام گۆشتی كوڵاو هیچ كێشەی نیە و سەلامەتە و نابێتە هۆی توشبوون بە تای خوێنبەربوون.

10- ئەگەر ئاژەڵ گەنەی هەبوو باشتر وایە نەكڕێت یان سەر نەبڕێت بو دووربوون لە تای خوینبەربوون، چونكە نەخۆشیەكە دەگوازرێتەوە.