لە جیهانی ئەمڕۆدا کە تەکنەلۆژیا بەشێکی دانەبڕاوە لە ژیانمان، زۆربەی کاتەکانمان لەبەردەم شاشە جیاوازەکاندا بەسەر دەبەین، چ وەک پڕۆگرامسازێک کە خەریکی نووسینی کۆدە، یان کارمەندێک کە لە کۆمپانیایەکدا کار دەکات، چاوەکان ڕووبەڕووی فشارێکی زۆر دەبنەوە، پزیشکەکانی چاو باس لە یەکێک لە باشترین تەکنیکە جیهانییەکان دەکەن بۆ پاراستنی چاو.

ماندووبوونی چاوی دیجیتاڵی چییە؟

پزیشکەکانی چاو دەڵێن "کاتێک بۆ ماوەیەکی درێژ سەیری شاشە دەکەیت، ماسولکەکانی چاوت تووشی ماندووبوون دەبن، نیشانەکانی وەک سووربوونەوەی چاو، لێڵبینی، وشکبوونەوە و تەنانەت سەرئێشەی بەردەوام دەردەکەون،" پزیشکان ئەم حاڵەتە بە "Computer Vision Syndrome" ناو دەبەن.

یاسای 20-20-20 چییە؟

ئەم یاسایە لەلایەن ئەکادیمیای ئەمریکی بۆ نەخۆشییەکانی چاو پێشنیار کراوە و زۆر سادەیە، بەڵام کاریگەرییەکی سەرسوڕهێنەری هەیە:

-هەر 20 خولەک جارێک: کارەکەت بۆ ساتێکی کەم ڕاگرە.

-بۆ ماوەی 20 چرکە: پشوو بدە و سەیری شاشەکە مەکە.

-سەیری 20 پێ (6 مەتر) دوورتر بکە: سەرنج بخەرە سەر شتێکی دوور بۆ ئەوەی ماسولکەکانی چاوت خاو ببنەوە.
بۆچی ئەم 20 چرکەیە گرنگە؟

کاتێک سەیری شاشەیەکی نزیک دەکەیت، چاوەکانت وەک ماسولکەیەک وان کە قورساییەکیان هەڵگرتبێ،. کاتێک سەیری دوور دەکەیت، وەک ئەوە وایە ئەو قورساییە دابنێیت و پشوو بە ماسولکەکان بدەیت، ئەمە ڕێگری دەکات لە کزبوونی چاو لەسەر مەودای دوور.

چەند ئامۆژگارییەکی زێڕین بۆ تەندروستی چاو:

1. چاوەکانت بتروکێنە بۆ ئەوەی فرمێسک بەسەر چاودا بڵاو ببێتەوە و ڕێگری لە وشکبوونەوە بکات.
2. هەمیشە هەوڵ بدە ڕووناکی شاشەکەت هاوسەنگ بێت لەگەڵ ڕووناکی ئەو ژوورەی لێی دانیشتوویت.
3. پێویستە شاشەی کۆمپیوتەرەکەت کەمێک لە ئاستی چاوەکانت نزمتر بێت (نزیکەی 15بۆ 20 پلە).

سەرچاوەی توێژینەوە پشتگیرەکان:
ئەکادیمیای ئەمریکی بۆ نەخۆشییەکانی چاو (AAO): ئەم ناوەندە گەورەترین ڕێکخراوی جیهانییە کە یاسای 20-20-20 وەک ستانداردێکی جیهانی بۆ بەرەنگاربوونەوەی ماندووبوونی چاوی دیجیتاڵی دەناسێنێت.

توێژینەوەی زانکۆی ئاستۆن (Aston University ): توێژینەوەیەکی زانکۆی ئاستۆنە کە دەڵێت:جێبەجێکردنی ئەم یاسایە نەک تەنها ماندووبوون کەم دەکاتەوە، بەڵکو بە شێوەیەکی بەرچاو نیشانەکانی وشکبوونەوەی چاویش لادەبات.

گۆڤاری پزیشکی چاوی نیپاڵ (Nepalese Journal of Ophthalmology): لە توێژینەوەیەکدا لەسەر خوێندکارانی زانکۆ، سەلمێنراوە ئەو کەسانەی لە کاتی کارکردندا سەیری شتی دوور دەکەن، زۆر کەمتر تووشی کزبوونی چاو دەبن لەوانەی کە بەردەوام سەیری شاشە دەکەن.