لە سلێمانی ئاڵای کوردستان بە درێژی 120م نەخشێنرا.

ئەمڕۆ دوو شەممە 16ـی شوباتی 2026، بە سەرپەرشتی لیلی عومەر، سەرۆکی شارەوانیی سلێمانیی و ئامادەبوونی جێگر و یاریدەدەری سەرۆک و بەڕێوەبەری بەڕێوەبەرایەتییەکانی شارەوانی و لێپرسراوانی بەش و هۆبەکانی سەرۆکایەتیی، ڕێوڕەسمێکی شایستە و جیاواز بۆ نەخشاندنی ئاڵای کوردستان بە درێژی (120م) لەسەر دیوارێکی ڕاگر نزیک بینای سەرۆکایەتیی شارەوانی بەڕێوەچوو.

ڕێوڕەسمەکە هەڵگری پەیامێکی قوڵ و واتاداربوو، نەخشاندنی ئاڵای کوردستان لەسەر دیواری ڕاگر تەنها کارێکی هونەری نییە؛ بەڵکو دەرخەری مێژوو و ناسنامەی نەتەوەیەکە، ئاڵامان هێمای گیانبەخشی خوێنی شەهیدان و ئاشتی و سروشتە، واتای بەردەوامیی و هەڵهاتنی ڕۆژێکی نوێیە بۆ گەلێک کە هەرگیز تاریکیی تیایدا بەردەوام نابێت، بۆ گەلێک هەمیشە بەگژ ناحەقیدا چووەتەوە و زوڵمی قبوڵ نەکردووە، بۆ گەلێک هەمیشە پشتگیریی و پشتییوانی یەکدی دەکەن و یەکتر جێناهێڵن، بۆ گەلێک سنوورە جوگرافییەکان هەرچۆنێک لە نێوانیاندا کێشرابێت گوێی پێنادەن و بەخوێن و ماڵ بەرگریی لە خاک و نەتەوە و ڕۆڵەکانیان دەکەن.