وەزارەتی کارەبا رایگەیاند، نرخ زیاد نەکراوە و هۆکاری بەرزیی پسوولەکان بۆ سەرمای زستان و درێژیی ماوەی خوێندنەوە دەگەڕێتەوە

ئەمڕۆ دووشەممە 9ـی شوباتی 2026، وەزارەتی کارەبای هەرێم رایگەیاند، هیچ گۆڕانکارییەک لە نرخەکانی کارەبای ڕووناکی نەکراوە و ئەو دەنگۆیانەش ڕەت دەکاتەوە کە باس لە بوونی کێشە لە ژێرخانی پێوەرە زیرەکەکان دەکەن و پێوەرەکان بە وردی کار دەکەن.

ئاماژەی بەوەشکرد، ئەم زستانە بارودۆخێکی جیاوازی هەبووە، بەوەی ئەمە یەکەم زستانە زۆربەی هاووڵاتیان کارەبای بەردەوامیان هەبووە، ئەمەش بووەتە هۆی زیادبوونی بەکارهێنان، هاوکات بەهۆی نزمبوونەوەی پلەکانی گەرما لە مانگی یەکدا، خواست لەسەر کارەبا بۆ گەرمکەرەوەکان گەیشتووەتە بەرزترین ئاست.

وتیشی، دوایین پارەدانی پسوولەکان ڕەنگدانەوەی خولێکی درێژترە کە بە تێکڕا 46 ڕۆژە، ئەمەش بەهۆی گواستنەوەی سیستەمەکانەوە بووە، ئەمە تەنها یەکجارە و لە داهاتوودا خولەکان کورت دەبنەوە، هەروەها درێژیی ماوەکە کاریگەری لەسەر نرخی یەکەی کارەبا نییە و تەنها کۆکردنەوەی ڕۆژەکانە.