دوای ئەو هەڵماتە میدیاییەی میدیاکانی یەکێتی و پارتی بەهۆی ڕووداوەکەی لالەزارەوە دژی یەکتر دەستیانپێکرد، سەنتەری میترۆ ڕاگەیەنراوێکی بڵاوکردەوە و داوادەکات، لایەنە سیاسییەکانی هەرێم دەزگا ڕاگەیەندنەکانیان پابەند بکەن بە بەررزترین ستانداردەکانی پیشەیی بوونی ڕۆژنامەوانی.

ئەمڕۆ دووشەممە، سەنتەری میترۆ ڕاگەیەنراوێکی لەبارەی دۆخی ڕاگەیەندن و ئەو هەڵمەتە میدیاییەی دەزگا ڕاگەیەندنەکانی یەکێتی و پارتی بەهۆی ڕووداوەکەی لالەزارەوە دژی یەکتر دەستیانپێکردووە و هەوڵی بڵاوکردنەوەی زانیاریی ناڕاست و ساختە دەدەن، لە سەنتری میترۆدا هاتووە: " سەنتەری میترۆ داوا لە هەموو قەوارە سیاسییەكانی هەرێمی كوردستان دەكات بە تایبەتیش پارتی دیموكراتی كوردستان و یەكێتی نیشتیمانی كوردستان و هەموو ئەوانەی پەرۆشن بۆ داهاتووی هەرێمی كوردستان، میدیا نەكەنە سەكۆیەك بۆ گوتاری ڕق و كینە، ناوزڕاندن، هاندانی توندوتیژی و دوبەرەكی، كە دەبنە هەڕەشە بۆ ئاشتی كۆمەڵایەتی و قەوارەی سیاسی هەرێم."

ئاماژە بەوەش کراوە: "داوا لە پارتە سیاسییەكان دەكەین، دەزگاكانی ڕاگەیاندنیان، پابەندبكەن بە بەرزترین ستانداردەكانی پیشەیی بوونی ڕۆژنامەگەری. ڕاستی و وردبینی و هاوسەنگی و بابەتیانە هەواڵ داڕێژن و بڵاویبكەنەوە، رێگربن لەوەی میدیای رەسمی و سێبەرەكان، نەكرێتە سەكۆیەك بۆ سووكایەتیكردن و تۆمەت بەخشینەوەو درۆ و قسەی رقاوی وێرانكەر كە تەنها بە زیانی ئاشتی كۆمەڵایەتی كۆتایی دێت."

سەنتەری میترۆ هۆشداریی دەدات لە مەترسییەكانی هەڵكشانی میدیای نابەرپرسانەیە كە برەو بە روحی ناوچەگەری و درێژەدان بە هەڵمەتی میدیایی قۆناغی سەردەمی شەڕی براكوژییە.

لە ڕاگەیەنراوەکەدا، ئەوەش هاتووە: "بەشێك لە میدیاكان بوون بە سووتەمەنی بۆ ناكۆكی و دروستكردنی ژینگەی گرژی و بێمتمانەیی لە نێو هاوڵاتیان، ئێمە نیشانەكانی ئەم مەترسییە دەبینین كە هەڕەشە لە ئاسایشی كۆمەڵگاكەمان دەكات و خەڵك لە پرسە ڕاستەقینە و گرنگەكانیان سەرقاڵ دەكات".

ڕاشیگەیاندووە: "بەبیرهێنانەوەی ئێمە لە بەرپرسیارێتی هەموو سەركردە سیاسی و حزبەكانە، بەرپرسیارێتی مێژوویی و ئەخلاقی خۆیان بیردەخەینەوە بۆ كۆنترۆڵكردنی ئەو گوتارەی كە لەلایەنگران و دەزگاكانی ڕاگەیاندنیانەوە سەرچاوەی گرتووە".

سەنتەری میترۆ داواش دەکات، لەبری شەڕی میدیایی، پەنا بۆ بنەمای عەقڵ و لۆژیك بەرن، هاوڵاتیان دەپرسن چارەنووسی كوردستان بەرەو كوێ دەبەن؟، كوا بەرژەوەندی باڵای خەڵكی كوردستان كە دەڵێن لەسەروو هەموو بەرژەوەندییەكەوەیە؟ كە مافی مووچە وەرگرتنیان لێبڕاوە، سەقامگیرییان پێببەخشن، بهێڵن دەروونیان ئارام بێت.

جەختیش دەکاتەوە: "ئایندەی هەرێمی كوردستان، بەرپرسیارێتییەكی دەستەجەمعییە. با گوێ لە دەنگی عەقڵ و لۆژیكی بگرین، بۆ ئەوەی لێبوردەیی نەبێت بەڕابردوو و توندوتیژیش شۆڕنەبێتەوە بۆ كۆڵان بە كۆڵانی ئەم هەرێمە زامدارە".

لەکۆتایی ڕاگەیەنراوەکەیدا، سەنتەری میترۆ داوای جڵەوکردنی دەزگا ڕاگەیەندنەکانی یەکێتی و پارتی کردووە و باسی لەوە کردووە: "خەڵكی كوردستان شایەنی ئەم ریسكە سیاسییە نییە، تكایە چاودێری میدیاكانتان بكەن، بزانن چۆن بەشێکیان كراون بە سەنگەری شەڕی ناوخۆ".