دەزگای ئاسایشی هەرێم (سلێمانی) دەڵێت، دوو تیرۆریستیان دەستگیر کردووە کە پیلانی ئەنجامدانی تەقینەوەیان هەبووە لە یەکێک لە بنکەکانی بەرگریی شارستانی.

ئەمڕۆ چوارشەممە، دەزگای ئاسایشی هەرێم، ڕاگەیەندراوێکی بڵاوکردەوە و باس لەوە دەکات: "دوای بەدواداچوون و لێکۆڵینەوەی ورد لە بڵاوبوونەوەی گرتە ڤیدیۆیەک لە تۆڕە کۆمەڵایەتییەکان لەبارەی هەڕەشە کردن و تەقینەوە توانرا شوێنی تیرۆریستان دەستنیشان بکرێت و لەنێوان 22 تاوەکو 24ـی 6 دەستگیر کران".

دەزگای ئاسایش لە ڕاگەیەندراوەکەیدا ئاماژەی بەوەشکردووە: "یەکێک لە تیرۆریستەکان کارمەندی بنکەی بەرگریی شارستانی بوو."

هەر بەپێی ڕاگەیەندراوەکە، دوای دانپێدانان دەرکەوتووە "تیرۆریستان بەنیازبوون لەپلانی یەکەمدا ژەهر بکەنە نێو تانکی ئاوی خواردنەوەی یەکێک لە بنکەکانی بەرگریی شارستانیی سلێمانی، لەپلانی دووەمدا لەڕێگای لکاندنی بۆمب بە ئۆتۆمبێلی بنکەکە تەقینەوە ئەنجام بدەن، بەڵام بەڕێوەبەرایەتیی گشتیی ئۆپەراسیۆنەکانی ئاسایش بەسەرکەوتوویی توانیان شکست بە پیلانی تیرۆریستان بهێنن و دەستگیریان بکەن."

دەزگای ئاسایشی هەرێم ڕاشیگەیاند: "لەئێستادا تیرۆریستان بەمادەی(2)ـی تیرۆر دەستگیرکراون و لێکۆڵینەوە لەدۆسیەکانیان بەردەوامە".