وەزارەتی خوێندنی باڵا و توێژینەوەی زانستیی هەرێمی کوردستان دەڵێت، دەرچووانی بەشە پزیشکییەکان دادەمەزرێن. بەرپرسێکی خوێندنی باڵا لە هەرێمی کوردستان دەڵێت، تەنیا دەرچووانی ناوچە کێشەلەسەرەکان دەگرێتەوە، نەک هەرێمی کوردستان.

ئەمڕۆ سێشەممە، وەزارەتی خوێندنی باڵا و توێژینەوەی زانستیی هەرێم ڕایگەیاند: "فۆڕمی دامەزراندنی وەزارەتی تەندروستیی عێراقی فیدراڵ بۆ دامەزراندنی دەرچووانی کۆلێژی پزیشکی گشتی، کۆلێژی پەرستاری و پەیمانگە پەرستارییەکانی زانکۆکانی هەرێمی کوردستان (2023-2024) بڵاودەکەینەوە کە دانیشتووی ناوچەکانی دەرەوەی ئیدارەی هەرێمی کوردستانن."

لەم بارەیەوە، د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵای هەرێم، لە لێدوانێکدا ئاماژەی بەوە کرد: "عێراق هەر بودجەیەک بۆ دامەزراندن تەرخان دەکات، پەیوەندیی بە هەرێمی کوردستانەوە نییە."

بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا وتیشی: "بڕیارەکە ئەو دەرچووانە دەگرێتەوە کە خەڵکی ناوچەکانی مادەی 140ن و لە زانکۆ و پەیمانگەکانی هەرێمی کوردستان خوێندنیان تەواو کردووە."