وەزارەتی پێشمەرگەی هەرێم ڕایگەیاند، هاوکارییە داراییەکانی هاوپەیمانان بۆ مانگی حەوت (تەممووز) گەیشتووەتە دەستیان و دوای تەواوبوونی رێکارەکان، سبەینێ دەست بە دابەشکردنی دەکرێت.

ئەمڕۆ سێشەممە، وەزارەتی پێشمەرگە ڕاگەیەندراوێکی بڵاوکردەوە و دەڵێت: "دوای ئەنجامدانی رێکارە دارایی و ژمێریارییەکان لەلایەن بەڕێوەبەرایەتیی گشتیی بودجە و بەرنامەکان (ژمێریاریی سەربازی)، ڕۆژی پێنجشەممە 7ـی ئاب دەست بە دابەشکردنی دەکرێت."

وەزارەتی پێشمەرگە ئاماژەی بەوەش کرد: " لەم مانگەدا نزیکەی 74 هەزار ئەفسەر و پلەدار و پێشمەرگە لە ڕێگەی پڕۆژەی هەژماری منـەوە هاوکارییەکە وەردەگرن و ئەوانی دیکەش لە رێگەی سیستمی بانکیی ئاساییەوە پارەکەیان پێدەدرێت".

لە کۆتایی راگەیەندراوەکەدا، وەزارەتی پێشمەرگە هۆشداری دەدات و جەخت دەکاتەوە کە "سەرچاوەی فەرمی بۆ هەموو هەواڵ و زانیارییەکانی پەیوەست بە هێزی پێشمەرگە، تەنها ماڵپەڕی فەرمی و سۆشیال میدیا و پلاتفۆرمەکانی وەزارەتی پێشمەرگەیە" و وەزارەتەکە بەرپرسیارێتیی هیچ زانیارییەکی هەڵە لە سەرچاوەکانی ترەوە هەڵناگرێت.