وەزیری دەرەوەی ئەمریکا: بەبێ ڕەزامەندی ئیسرائیل هیچ دەوڵەتێکی فەڵەستینی بوونی نییە

١ ئابی ٢٠٢٥

بڵاویبکەرەوە لە

وەزیری دەرەوەی ئەمەریکا، پلانی وڵاتانیا بەریتانیا، فەرەنسا و کەنەدا بۆ داننان بە دەوڵەتێکی فەڵەستینی بە "بێ بەها" ناوبرد و دووپاتیشی کردەوە بەبێ ڕەزامەندیی ئیسرائیل هیچ دەوڵەتێکی فەڵەستین بوونی نییە.

ئەمڕۆ هەینی، مارکۆ ڕوبیۆ وەزیری دەرەوەی ئەمریکا، بە کەناڵی فۆکس نیوزی ڕاگەیاند: "ئەم پلانە بۆ هەندێک کەس بێزارکەرە، نائارامکەرە و هیچ مانایەکی نییە".

ئاماژەی بەوەش کرد، یەکەم؛ هیچ کام لەم وڵاتانە توانای دروستکردنی دەوڵەتی فەڵەستینییان نییە و ناتواندرێت دەوڵەتی فەڵەستینی هەبێت مەگەر ئیسرائیل پێی ڕازی بێت. دووەم؛ تەنانەت ناتوانن دیاری بکەن کە ئەو دەوڵەتە فەڵەستینییە لە کوێ دەبێت و ناتوانن دیاری بکەن کە کێ حوکمڕانی دەکات. سێیەم؛ پێموایە ئەمە بێ یارمەتییە.

هەروەها ڕوبیۆ، دەشڵێت: داننان بە دەوڵەتێکی فەڵەستینی "پاداشتی حەماس دەداتەوە و هانیان دەدات ئاگربەست لە غەززە ڕەتبکەنەوە".

پێشووتریش، وتەبێژی کۆشکی سپی پێشتر ڕایگەیاندبوو کە دۆناڵد ترەمپ سەرۆکی ئەمەریکا "ناڕەزایی و دژایەتی"ی خۆی بۆ سەرکردەکانی فەرەنسا، بەریتانیا و کەنەدا سەبارەت بە دانپێدانانی دەوڵەتێکی فەڵەستینی دەربڕی و بەهیچ جۆرێک لەگەڵ پلانی ئەم وڵاتانە نییە بۆ داننان بە فەڵەستین وەک دەوڵەتێک

بڕیار وایە لەمانگی نۆی ئەم ساڵ، فەڕەنسا، بەریتانیا، کەنەدا و چەند وڵاتێکی دیکەش بەفەرمی لە کۆبوونەوەی نەتەوە یەکگرتووەکان فەڵەستین وەک دەوڵەت بناسێنن و ئەم هەنگاوەش ناڕەزایی توندی ئیسرائیل و ئەمریکای لێکەوتووەتەوە بەم هەنگاوە ناڕازین و هێشتا لەلایەن وڵاتانی دیکەی ئەندام لە نەتەوەیەکگرتووەکان پێشوازی لێنەکراوە.