لە كۆبوونەوەی دوێنێیدا، حکومەتی کاربەڕێکەر بڕیاریداوە بەوەی 120 ملیارەكە بۆ بەغدا نانێرێت تاوەکو لە بەغداوە گرەنتی ناردنی مووچەی مووچەخۆرانی هەرێم نەکرێت.

ئەمڕۆ پێنجشەممە، سەرچاوەیەك لە حکومەتی کاربەڕێکەر لە لێدوانێکی میدیاییدا ڕایگەیاند: "بڕیار بوو ڕۆژی پێنج شەممە بڕی 120 ملیار دیناری داهاتی ناوخۆ بنێرێن بۆ بەغداد بۆ ئەوەی موچەی مانگی شەش خەرج بكرێت، بەڵام لەكاتی گفتوگۆكاندا گەیشتینە ئەوەی كە نەینێرێن".

باسی لەوەش کردووە، " لە كاتی گفتوگۆكاندا دانا عەبدولكەریم وەزیری ئاوەدانكردنەوە وتوویەتی پێویست ناكات ئەو بڕە پارەیە بنێرێن بۆ بەغدا چونكە زەمانەتی ناردنی مووچە نیىە لە بەغداوە، ئێمە پێویستە لەگەڵ مووچە داوای خەرجی پرۆژەكانیش بكەین".

بەپێی وتەی ئەو سەرچاوەیە، هەربۆیە حکومەتی کاربەڕێکەری هەرێم دوای ئەو پێشنیازە بڕیاردەدات بەوەی بڕی 120 ملیار داهاتی ناوخۆ ڕەوانەی بەغدا نەکات کە بڕیار بوو ئەمڕۆ ئەو بڕە پارەیە بخەنە سەر هەژماری بانکیی عێراق.

هەربۆیە لەمەودوا حكومەتی کاربەڕێکەری هەرێم چاوەڕوانی وەرگرتنی ڕەزامەندیی بەغدا دەکات لەڕێگای فوئاد حسێن جێگری سەرۆک وەزیرانی عێراق سەبارەت بە ناردنی مووچەی فەرمانبەرانی هەرێم، دواتر حكومەتی کاربەڕێکەریش 120 ملیار دینارەكە بۆ بەغدا دەنێرێت.