دایکی رۆژنامەنووس وریا حەمە کەریم، لەبارەی بڵاوکردنەوەی هەواڵی بڕینی مووچەی کوڕەکەی روونکردنەوە دەدات.

حەمیدە حەسەن، دایکی رۆژنامەنووس وریا حەمە کەریم، لە لێدوانێکدا دەربارەی بڵاوکردنەوەی هەواڵی بڕینی مووچەی کوڕەکەی رایگەیاند: "کاک شاسوار مووچەی منداڵەکانی کوڕەکەمی نەبڕیوە و زۆرم پێ ناخۆش بووە کە ئەو هەواڵە بە ناوی منەوە بڵاوکراوەتەوە، بەڵام هەموو ئەو هەواڵانە دوورن لە راستییەوە".

ئاشکراشیکرد: "مووچەکەی وریا بەردەوامە و بەردەوامیشی دەبێت و هەر کات مووچەی هاوکارەکانی خەرجبکرێت مووچەکەی وریاش خەرجدەکرێت و رانەگیراوە".

جەختیشیکردەوە: "ئەو پەیجانەی بەناوی خەڵکەوە هەواڵی ناڕاست بڵاودەکەنەوە، قبوڵی ناکەم هیچ هەواڵێکی ناڕاست بە ناوی من و کوڕەکەمەوە بڵاوبکەنەوە ئەگەر نا دەرگای دادگایان لێ دەگرم".

وریا حەمە کەریم، رۆژنامەنووس و پەیامنێر، سەرلەبەیانى رۆژى 6-2-2025، بە رووداوێکی هاتووچۆ لەسەر رێگای عەربەت – سلێمانی، گیانی لەدەستدا.