چا یەکێکە لە خواردنەوە تایبەتەکان کە زۆرکەس ئارەزووی دەکەن، هەروەها چەندین سوودی تەندروستی هەیە، لەوانە دەوڵەمەندە بە دژە ئۆکسێنەرەکان کە رێگری لە تووشبوون بە نەخۆشیی دەکات.

بەپێی بابەتێکی ماڵپەڕی "times now" ، رۆژانە خواردنەوەی کوپێک چا لە جەڵتەی مێشک و جەڵتەی دڵ دەتپارێزێت و سوڕی خوێن باشتر دەکات، بەڵام دووبارە گەرمکردنەوەی چا کاریگەری نەرێنی لەسەر جەستە دروست دەکات.

دووبارە گەرمکردنەوەی چا یان کوڵاندنی دوای ماوەیەکی دیاریکراو رەنگە خواردنەوەکە لە تام و تایبەتمەندییە خۆراکییەکانی و تەنانەت بۆنەکەشی بێبەش بکات، ئەگەر چایەکە زیاتر لە چوار کاتژمێر هەڵگیرابێت، باش نییە دووبارە گەرم بکرێتەوە چونکە دەبێتە هۆی تێکچوونی گەددە، سکچوون، گرژبوونی گەددە و کێشەی دیکەی هەرس.

هەروەها دووبارە گەرمکردنەوەی چا چڕیی تانینەکان زیاد دەکات، پێکهاتە کیمیاییەکان کە بە پرۆتین و سێلولۆز و نیشاستە و کانزاکانەوە دەبەسترێتەوە، ئەمەش دەبێتە هۆی ئەوەی تامی چایەکە تاڵتر بێت.

هەرچەندە تانینەکان زیانیان نییە، بەڵام زیادەڕەویی لە خواردنی ڕەنگە کاریگەری لەسەر هەڵمژینی هەندێک لە ماددە خۆراکییەکان هەبێت، وەک ئاسن.