لێپرسراوی سەنتەری فریاکەوتنی سلێمانی، ڕایگەیاند، ژمارەی بریندارەکانی گرژییەکانی شەوی ڕابردووی یاریگای نەورۆز گەیشتووەتە 57 کەس، زۆربەی بریندارەکان دۆخی تەندروستییان جێگیربووە و ڕەوانەی ماڵەوە کراون.

سامان نادر، لێپرسراوی سەنتەری فریاکەوتنی سلێمانی، لە لێدوانێکدا ڕایگەیاند: "لە دوای گرژییەکانی شەوی ڕابردووی یاریگای نەورۆز ئێمە بە ئەمبۆلانسەکانمان 27 کەسمان گەیاندووەتە نەخۆشخانە، هاوڵاتییان بە ئۆتۆمبێلی خۆیان 10 کەسیان گەیاندووەتە نەخۆشخانە و 20 کەسیش لە شوێنی ڕووداوەکە چارەسەی پێویستیان بۆ کراوە".

دەشڵێت: "زۆرینەی بریندارەکان برینەکانیان سووک بوون و دوای چارەسەر ڕەوانەی ماڵەوە کراونەتەوە، ڕەنگە چەند بریندارێکی کەم لە نەخۆشخانە مابنەوە کە شکاویان هەبووبێت".

شەوی ڕابردوو، لەکاتی بەڕێوەچوونی یاری نێوان یانەی نەورۆز و زاخۆ، لە یاریگای نەورۆز، گرژی و ئاڵۆزی کەوتە نێوان هاندەرانی هەردوو یانە و بووە هۆی ڕاگرتنی یاریەکە.