ئاسایشی هەولێر ڕایگەیاند، تۆمەتبارێک کە بڕێک زێڕی ساختەی لە بازاڕەکانی شاری هەولێر ساخ کردبۆوە دەستگیرکرا.

ئەمڕۆ یەکشەممە، 20-4-2025، بەڕێوەبەرایەتی ئاسایشی هەولێر لە ڕاگەیەندراوێکدا ڕایگەیاند، دوای ئەوەی لە لایەن چەند شوێنکارێکی (زێڕنگری) لەشاری هەولێر ئاگادار کراینەوە کە کەسێک لە چەند دوکانێکی زێڕنگری هەڵساوە بە فرۆشتن و ساخ کردنەوەی چەند پارچە زێڕێکی ساختە.

ئاشکراشیکرد، دوای ئەنجامدانی بەدوادچون لە لایەن هێزەکانمانەوە، ناسنامەو شوێنی تۆمەتبارەکەمان دەستنیشان کرد،بەناوی (ڕ ، أ ، ڕ) کە خەڵکی وڵاتی سوریایە.

ئەوەشی خستەڕوو، دواتر بەفەرمانی دادوەری لێکۆڵینەوەی ئاسایشی هەولێر تۆمەتباری ناوهاتومان دەستگیر کرد.

ئاسایشی هەولێر داوا دەکات، هەر کەسێک سکاڵای یاسای لەسەری هەیە سەردانی بەڕێوەبەریەتیەکەیان بکات.