فەرمانگەی تەندروستی کەرکووک ڕایگەیاند، تاوەکو ئێستا بەهۆی تەنگەنەفەسی 119 کەس ڕەوانەی نەخۆشخانەکران.

فەرمانگەی تەندروستیی کەرکووک لە ڕاگەیەندراوێکدا ڕایگەیاند، ئامادەکاری تەواویان بۆ ئەو کەسانە کردووە کە تووشی تەنگەنەفەسی دەبن و سەر لە ئێوارەی دوێنێ چوارشەممە ژمارەیەک هاووڵاتیی کەرکووک بەهۆی خۆڵبارینەوە تووشی تەنگە نەفەسی بوون و گەیەنرانە نەخۆشخانەکان.

ڕوونیشیکردەوە، لە نەخۆشخانەی کەرکووکی فێرکاری 36 کەس، لە نەخۆشخانەی ئازادی کەرکووک 23 کەس داخل کراوە، هەروەها لە شارۆچکەی داقوقیش 60 کەس بەهۆی تەنگەنەفەسی داخلی نەخۆشخانە کراون کۆی گشتیی نەخۆشەکان دەکاتە 119 کەس.

هەروەها زۆرێک لە نەخۆشەکان بەهۆی تەنگەنەفەسی زۆرەوە، تاکوو کاتژمێر 9:00ـی ئەم بەیانییە لە نەخۆشخانە مابوونەوە، لە چەند کاتژمێرێکی داهاتوودا ئەوانیش نەخۆشخانەکە جێ دەهێڵن، سەرجەمیشیان چارەی پزیشکیان وەرگرتووە.

هاوکات، لەسەرەتای خۆڵبارینەکە هەڵمەتێکی هۆشیاریی لەلایەن بەڕێوەبەرایەتیی پۆلیسی کەرکووک بڵاو کرایەوە، داوای لە شۆفێران و هاوڵاتییان کرد هەر کەسێک گەشتی هەیە لە شەودا ئەو گەشتە نەکەن و دوای بخەن بۆ بەرەبەیانی ئەمڕۆ پێنجشەممە، تاکوو ڕووداوی هاتوچۆ ڕوو نەدات.