وەزارەتی دەرەوەی سووریا ڕایگەیاند، لە ئەنجامی هێرشەکەی ئیسرائیل فڕۆکەخانەی سەربازیی حەما بە تەواوی وێران بوو و دەیان هاوڵاتی مەدەنی و سەربازیش برینداربوون.

وەزارەتی دەرەوەی سووریا، لە بەیاننامەیەکدا ڕایگەیاند، هێرشەکە، پێنج ناوچەی جیاوازی لە سەرانسەری ئەو وڵاتە بۆمباران کردووە، لە پێشێلکارییەکی ئاشکرای یاسا نێودەوڵەتییەکان و سەروەریی خاکی سووریای عەرەبی.

ئاماژەی بەوەشکرد، هێزەکانی ئیسرائیل لە ماوەی 30 خولەکدا هێرشی ئاسمانییان بۆ سەر پێنج ناوچەی جیاواز لە سەرانسەری وڵات دەست پێکرد، لە ئەنجامدا فڕۆکەخانەی سەربازیی حەما بە تەواوی وێران بوو و دەیان هاووڵاتی مەدەنی و سەربازیش برینداربوون.

ئاشکراشیکرد، ئەوە لە کاتێکدا سووریا لە دوای 14 ساڵ لە شەڕ بەدوای ئاوەدانکردنەوەدایە، ئەم هێرشە دووبارەبووانە لە چوارچێوەی هەوڵێکی ڕوونی ئیسرائیلدا دێت بۆ گەڕانەوەی توندوتیژی بۆ سووریا، تاوەکوو هەوڵەکانی بوژانەوەی وڵاتەکە تێک بدات.

درەنگانی شەوی ڕابردوو، فڕۆکەکانی ئیسرائیل زیاتر لە 15 جار هێرشیان کردە سەر فڕۆکەخانەی حەما کە پێشتر بنکەیەکی ئاسمانیی سوپای سووریا بووە.

هەروەها فڕۆکە جەنگییەکانی ئیسرائیل زنجیرەیەک هەڵمەتیان بۆ سەر فڕۆکەخانەی سەربازیی T4 لە نزیک لادێکانی ڕۆژهەڵاتی حومس دەست پێ کرد.