ئۆتیزم وشه‌یه‌كی یۆنانییه‌، بەواتای‌ دابڕان و گۆشه‌گیری دێت و نەخۆشی ئۆتیزم بریتییه‌ له‌ تێكچوونێكی ئاڵۆزی گه‌شه‌ له‌ ئه‌نجامی تێكچوونی فه‌رمانه‌كانی مێشك و ده‌مار كه‌ له‌سێ ساڵی یه‌كه‌می ته‌مه‌نی منداڵیدا ڕووده‌دات.

پسپۆڕان ئاماژە بەوەدەکەن، ئۆتیزم، حاڵه‌تی ڕوودانی پشێوییه‌ له‌ گه‌شه‌كردنی خانه‌كانی مێشكدا و ده‌بێته‌ هۆی تێكچوونی كار و فه‌رمانه‌كانی مێشك، واته‌ سه‌رجه‌م به‌شه‌كانی مێشك له‌یه‌ك كاتداو به‌یه‌كه‌وه‌ كارناكه‌ن، ئه‌مه‌ش كاریگه‌ری توند ده‌خاته‌ سه‌ر په‌یوه‌ندیی زاره‌كی (قسه‌كردن) و نازاره‌كی (ئیشاره‌ت) و تێكه‌ڵاوبوونی كۆمه‌ڵایه‌تی و فێركردن و هه‌ڵسوكه‌وت، به‌وهۆیه‌شه‌وه‌ زۆرینه‌ی تووشبووانی نه‌خۆشی ئۆتیزم ناتوانن په‌یوه‌ندی له‌گه‌ڵ چوارده‌وریان ببه‌ستن.

ئەوەش ئاشکرا دەکەن، ڕێژه‌ی توشبوون نزیكه‌ی ( 3\4 ) له‌ (10000) منداڵدایه‌ و له‌ نێریه‌ندا به‌ڕێژه‌ی 3/1 زیاترە له‌ مێینه‌.

نه‌ته‌وه‌یه‌كگرتووه‌كان، ڕۆژی 2ــی نیسانی دیاریکردووە بە ڕۆژی جیهانی هۆشیاری‌ له‌ باره‌ی نەخۆشی ئۆتیزم و هه‌موو ساڵێك له‌م ڕۆژه‌دا یاد ده‌كرێته‌وه‌.