وەزارەتی گەنجینەی ئەمریکا، سزای بەسەر ژمارەیەک کۆمپانیا و کەساییەتیدا سەپاند، کە هاوکاری ئێران دەکەن لە بەرهەمهێنانی درۆن و مووشەک، دووپاتیشیکردەوە، کە ئەو سزایانە بەردەوام دەبن.

ئەمڕۆ سێشەممە، 1-4- 2025، سکۆت بێسنت، وەزیری گەنجینەی ئەمریکا، ڕایگەیاند: "وەزارەتی گەنجینەی ئەمریکا بە هەماهەنگی لەگەڵ وەزارەتی دادی ئەمریکا، سزایان بەسەر شەش کۆمپانیا و دوو کەسایەتی پەیوەندیدار بە ئێران سەپاند، بە تۆمەتی ئەوەی پارچەکانی فڕۆکەی بێ فڕۆکەوانی (UAV) بۆ پرۆگرامی درۆنی و مووشەک دابین دەکەن".

ڕاشیگەیاند: "گواستنەوەی درۆن و مووشەک لەلایەن ئێرانەوە بۆ گرووپە تیرۆریستییەکانی ناوچەکە و ڕووسیا بۆ هێرشکردنە سەر ئۆکرانیا، مەترسی لەسەر خەڵکی مەدەنی و کارمەندانی ئەمریکا و هاوپەیمانانمان دروست کردووە".

جەختیشیکردەوە، وەزارەتی گەنجینەی ئەمریکا لە بە ئامانجگرتنی ئەو کۆمپانیا و پیشەسازی سەربازییانە کە هاوکاری ئێران دەکەن و مووشەک و درۆن و چەکی دیکە دابین دەکەن بەردەوام دەبێت.

بە پێی ڕاگەیەنراوی وەزارەتی گەنجینەی ئەمەریکا، دوو کەس لەوانەی سزادراون لە ئێرانن، کۆمپانیایەکیش لە چینە و چوار کۆمپانیای دیکەش لە ئیماراتن.

ئاماژەی بەوەشکردوە، "لەو کاتەی دۆناڵد ترەمپ، بووە بە سەرۆکی ئەمەریکا، ئەمە دووەم گەڕی سزاکانە بۆ سەر ئەو کۆمپانیایانە کە هاوکاری ئێران دەکەن".