وتەبێژی گشتی گەشتو‌گوزاری سلێمانی ڕایگەیاند، لە ‏سێیەم ڕۆژی جەژنی ڕەمەزاندا، گەشتیاران بە لێشاو ڕوویان لە شاری ‏سلێمانی كردووە و 70% هۆتێل‌ و مۆتێلەكان پڕبوون ‌لە گەشتیار و لە هەندێ شوێنیش جێگا نەماوە.

گۆران قادر، وتەبێژی بەڕێوەبەرایەتی گشتی گەشتوگوزاری ‏سلێمانی، ‏لە لێدوانێکدا ڕایگەیاند: "لە ئەمڕۆ ‏سێشەممەوە هاتنی گەشتیار بە بۆنەی جەژنی ڕەمەزانەوە بە لێشاو بۆ ‏شاری سلێمانی دەستپێكردووە و لە بازگەكاندا بە باشی پێشوازییان لێدەكرێت".‏

وتیشی: "‏سەرجەم هۆتێل‌ و مۆتێلەكان ئامادەكارییان بۆ هاتنی گەشتیار كردووە و ئەوەی تا ئێستا بە ئێمە گەیشتووە 70% هۆتێل‌ و مۆتێلەكان پڕبوون لە گەشتیار و شوێنیان نەماوە".‏

ئاماژەی بەوەشکرد، "لە داهاتوودا دەستەی گەشتوگوزار سەرجەم ئاماری ‏گەشتیاران ڕادەگەیەنێت‌، بەڵام ئەوەندەی بە ئێمە گەیشتووە ‏زیاد لە 100 گرووپی گەشتیاری لەم چەند ڕۆژەدا سەردانی شاری ‏سلێمانییان كردووە".

جەختی لەوەش كردەوە، "بە هیچ جۆرێك ناهێڵن هۆتێل ‌و ‏مۆتێلەكان لەم كاتەنەدا یاری بە نرخەكانەوە بكەن دەبێت پابەندی ئەو ‏نرخەبن كە پێشتر هەڵیانواسیووە"‌.

ئەوەشی ئاشکراکرد، "لە شاری سلێمانی شوێنی ‏مانەوەی یەك كەس لە 5 هەزار دینارەوە دەستپێدەکات تاوەكو نزیكەی ‏‏100دۆلار و گەشتیار بە ئارەزووی خۆی دەتوانێ‌ بەپێی توانای گیرفانی ‏شوێنی مانەوەی هەڵبژێرێت".