لە سنووری قەزای سیدەکانی ئیدارەی سەربەخۆی سۆران، بە مەبەستی هێنانی گیای بەهارە, مین بە هاوڵاتییەکدا تەقییەوە و گیانی لەدەستدا.

ڕابەر ئەنوەر، بەرپرسی ڕاگەیاندنی دەزگای گشتی کاروباری مین، لە لێدوانێکدا ڕایگەیاندووە: "بەیانی ئەمڕۆ چەند کەسێک بەیەكەوە چوونەتە چیای قەلەڕەش، لە سنووری سیدەکان بە مەبەستی هێنانی گیا بەهارییەکان و لەوێ مینێک بە کەسێکدا تەقیوەتەوە و گیانی لەدەستداوە".

ئاشکراشیکرد، هاوڵاتییەکە ناوی (نازم ساڵح)ـەو تەمەنی 33 ساڵانە، خێزاندارە و باوکی دوو منداڵە.

وتیشی، تەرمی ناوبراو ڕەوانەی پزیشکی دادی سۆران دەکرێت.

بەپێی زانیارییەکان، باوکی ئەم هاوڵاتییەش، لە ساڵی 2004، بەهۆی تەقینەوەی مین گیانی لەدەستداوە.

ئەمەش لە کاتێکدایە، لە ئەم ساڵدا لەو سنوورە، ئەمە سێیەمین ڕووداوی تەقینەوەی مینە ڕووبدات، کە بەهۆیەوە دوو کەس گیانیانلەدەستداوە و کەسێکیش بریندار بووە.

جێگای سەرنجە، هەر سێ ڕووداوەکە لە کاتی چوونی هاوڵاتییان بووە بۆ هێنانی گیای بەهارە.