مامۆستایانی ناڕازی ڕایانگەیاند، بە بیانوی دابیکردنی کارەبای 24 کاتژمێری دەیانەوێ نرخی کارەبا بەشێوەیەکی زۆر خەیاڵی گران بکەن.

دەقى راگەیەندراوەکەى مامۆستایانى ناڕازى:

بەناوی خوای گەورە

هۆشدارییەک لە ئەنجومەنی مامۆستایانی ناڕازییەوە

وەکو ئاگادارن زیاتر لە 30 ساڵە دەسەڵاتدارانی هەرێم داهاتی سەرخان و ژێرخانی ئەم وڵاتە بەتاڵان دەبەن و گەلی کوردستان بێ مووچە و برسی دەکەن.

بەتایبەتی لەدوای ئابوری بەناو سەربەخۆوە وە لەو ڕوژەوە ئەم دەسەڵاتە نەزانە بڕیاریدا بەبێ گەڕانەوە بۆ بەغداد نەوتی هەرێمی کوردستان بفرۆشی، بێ مووچەیی و هەژاری دواکەوتنی مووچە دەستی پێکرد.

دەسەڵاتدارە بێ ویژدانەکە لەجیاتی قەرەبوکردنەوەی ئەو دۆخە سەختەی ژیانی هاوڵاتیان و مووچەخۆران بەردەوام بە بڕیاری ستەمکارانە ژیان و گوزەرانی هاووڵاتیان سەختر دەکەن و گرانی و نەبوونی زیاتر دەکەن.

لەم چوارچێوەشدا بە بیانوی دابیکردنی کارەبای 24 کاتژمێری دەیانەوێ نرخی کارەبا بەشێوەیەکی زۆر خەیاڵی گران بکەن و تەواوی هاووڵاتیان بکەنە کرێچی کۆمپانیا حیزبی و بنەماڵەییەکانیان.

ئێمە لە ئەنجومەنی مامۆستایانی ناڕازی لەگەڵ هەستکردنمان بەم پیلانە ستەمکارانە و مەترسیدارە وە بۆ خستنە بەردەم بەرپرسیاریەتی و دروستکردنی کۆدەنگی جەماوەری دژی ئەم دزی و تاڵانییە لە گیرفانی هاوڵاتیان لە چەند ڕۆژی ڕابوردوو ژمارەیەک کۆبونەوە و دیدارمان ئەنجامدا لەگەڵ یەکێتی زانایانی ئاینی ئیسلام و ژمارەیەک لە ڕێکخراوەکانی کۆمەڵگەی مەدەنی و حیزب و لایەنە سیاسیەکانی دەرەوەی دەسەڵات.

بۆیە لێرەوە ڕایدەگەیەنین:

ئەرکی هەموو هاوڵاتیان و زانایانی ئاینی و حیزب‌ و ڕێکخراوەکانە پێش ئەوەی ببین بە کرێجی کۆمپانیاکانی حیزب‌ و بنەماڵە حکومڕانەکان، بەگژ ئەم پیلانە بێ ویژدانانە و ستەمکارانانەدا بچینەوە و هەڵویستی جدی وبەردەواممان هەبێت.

له کۆتاییدا ئێمە لە ئەنجومەنی مامۆستایانی ناڕازی هاووڵاتیان دڵنیا دەکەینەوە لە ئاست ئەم گیرفانبڕینە و هەر ستەمێکی تری بنەماڵە حکومڕانەکانی هەرێم بێدەنگ نابین، ئەگەر ڕانەگیرێن لە ئایندەدا بەهاوکاری سەرجەم چین و توێژەکانی تر هەڵوێستی بەرفراوانمان دەبێت .