سەرۆک وەزیرانی ئیسرائیل ڕایگەیاند، تا شەممەی داهاتوو حەماس بارمتەکان ئازاد نەکات سوپای ئیسرائیل دەگەڕێتەوە بۆ غەززە.

سێشەممە، 11-2-2025، بنیامین نەتانیاهۆ، سەرۆک وەزیرانی ئیسرائیل لە پەیامێکی ڤیدیۆییدا هۆشداری تووند دەداتە حەماس و ڕایگەیاند، ئەگەر تا شەممەی داهاتوو بارمتە ئیسرائیلییەکان ئازاد نەکرێن، ئەوا سوپای وڵاتەکەمان دەگەڕێتەوە بۆ غەززە و شەڕێکی سەخت دەست پێدەکەینەوە.

ئەوەشی خستەڕوو، دوا دەرفەت بۆ حەماس نیوەڕۆی ڕۆژی شەممەیە، ئەگەر تا ئەو کاتە بارمتەکان ئازاد نەکرێن، ئاگربەست کۆتایی دێت و حەماس لەناو دەبەین.

سەرۆک وەزیرانی ئیسرائیل، لەبارەی ترەمپەوە، ئاشکراشیکرد: "پیرۆزبایی لە هەڵوێستی سەرۆکی ئەمەریکا و دیدگا شۆڕشگێڕانەکەی لەبارەی غەززەوە دەکەم".

جەختی لەوەشکردەوە، تا بارمتەکان، بەپێی قۆناغی یەکەمی ڕێککەوتنی ئاگربەستەکە ئازاد نەکرێن، ئەوا ناچینە قۆناغی دووەمی دانوستانەکان.