پارێزگای هەولێر رایگەیاند، بە بڕیارى ئومێد خۆشناو، ئەو ڕێستۆرانتەى بانگەشەى فڕۆشتنى خواردنى گرانبەهاى دەکرد داخرا.

ئەمڕۆ سێشەممە، پارێزگای هەولێر لە راگەیەندراوێکدا بڵاویکردەوە: "دواى بڵاو بوونەوەى گرتە ڤیدۆیەک لە تۆڕەکۆمەلایەتییەکان، بە بڕیارى پارێزگارى هەولێر، ئەو ڕێستۆرانتەى لە هەولێر بانگەشەى فرۆشتنى جۆرێک خواردنی بە ناوى پیرۆزى کوردستان بە نرخێکى گرانبەها و ئێجگار بەرز دەکرد و بە هۆى پابەند نەبوونى بەیاسا و ڕێنماییەکان داخرا".

ئەمەش پاش ئەوە دێت، لە چەند رۆژی رابردوودا هەواڵی ئەوە بڵاوبووەوە، رێستۆرانتێک لە پارێزگای هەولێر جۆرە خواردنێک بەناوی "کوردستان" دەفرۆشێت کە نرخەکەی دەیان ملیۆن دۆلارە و وەک خاوەنی رێستۆرانتەکە دەڵێت، دەبێتە گرانبەهاترین خواردنی جیهان.