دوای ئەوەی بەدرێژایی ژیانی وەرزشی چەندین دەستکەوتی بەدەستهێنا، کریستیانۆ ڕۆناڵدۆی ئەستێرەی پورتوگالی باسی لە وادەی وازهێنانی کرد بۆ هەمیشەیی لە یاری تۆپی پێ.

دوای کۆتاییهاتنی یارییەکەی نێوان پورتوگال و پۆڵەندا پرسیار لە کریستیانۆ ڕۆناڵدۆ کرا کەی واز لە یاری تۆپی پێ دەهێنێت، وەڵامی ئەمجارەش تاڕادەیەک ڕاشکاوانە و ڕاستەوخۆ بوو، بەو پێیەی یاریزانەکە وادەیەکی نزیکی بۆ ڕوودانی ئەمە دیاریکرد و وتی: "تەنها دەمەوێت کاتێکی خۆش بەسەر بەرم، بەڵام پلانم هەیە کە وازبێنم، لەماوەی ساڵێک یان دوو ساڵدا، جارێ بە تەواوی نازانم".

ئاماژەی بەوەشکرد: "بەم زووانە تەمەنم دەگاتە چل ساڵ، دەمەوێت کاتێکی خۆش بەسەر بەرم و تا ئەو کاتەی هەست بە پاڵنەر دەکەم بەردەوام دەبم، ئەو ڕۆژە وازدەهێنم کە چیتر هەست بە پاڵنەر ناکەم".

ڕۆناڵدۆ لەم وەرزەدا ئاستێکی نایابی پێشکەش دەکات، چ لەسەر ئاستی نێودەوڵەتی لەگەڵ هەڵبژاردەی پورتوگال، هەروەها لەگەڵ یانەکەی نەسری سعودی، لەماوەی وەرزەی 2024/2025.