٢١ تشرینی یەكەمی ٢٠٢٤
پارێزگاری سلێمانی ڕایگەیاند، “دەخوازین بە زوترین کات وەڵامی ئیرادەو دەنگی ڕەوای هاووڵاتیان بدرێتەوەو لایەنەکان بگەنە ڕێکەوتنێک بۆ پێکهێنانی حکومەتێکی هاووڵاتیسەنتەریی و مەدەنی”.
هەڤاڵ ئەبوبەکر، پارێزگاری سلێمانی لە پەیامێکدا ڕایگەیاند: “بەبۆنەی ڕاگەیاندنی ئەنجامە بەراییەکانی هەڵبژاردنەکانی پەرلەمانی کوردستانەوە، بەناوی پارێزگای سلێمانییەوە؛ پیرۆزبایی خۆمان پێشکەش بە هەموو ئێوەی بەڕێزو هەموو بەشداربووانی ئەم پرۆسەیە ڕادەگەیەنین، بە کرداریی و بەپێی یاساو ڕێکارە کارگێڕیی و ئارامیی و خزمەتگوزارییەکان؛ خۆمان بە خاوەنی ڕاستەقینەی بەرێوەچوونی ئەم پرۆسەیە لە سنوری پارێزگاکەماندا دەزانین”.
ئاماژەی بەوەشکرد: “وەک چۆن لە ماوەی حوکمڕانیی و لە ماوەی بانگەشەو هەڵمەتی هەڵبژاردنەکان و ڕۆژی دەنگدانیشدا؛ بەیەک دووریی بەرامبەر هەمووان وەستاین، (بەبەڵگەی ئەوەی براوە جیاوازەکان زۆرتر لەم پارێزگایەدان)، بۆ داهاتووش تا ئەو کاتەی ئێمە بەپێی یاسا لەم پێگەیەدا دەبین: بەو بێلایەنییەوە کە هەموو لایەک گەواهیی بۆ دەدات”
ئەوەشی خستەڕوو: “دەرگای پارێزگا (وەک لە ڕابردودا سەلماندومانەو بەڕەوایەتیی 241241 دەنگی فەرمیی و زیاتر لە 41600دەنگی نافەرمیی و بە دەنگی کۆی فراکسیۆنەکانی ئەنجومەنی پارێزگای سلێمانی)؛ بۆ هەموو کەس و لایەک کراوە دەبێت و هاوکارو پشتیوانی هەموو کارێکی باش و یاسایی دەبین کە لە خزمەتی هاووڵاتیاندا بێ.
ئاشکراشیکرد: “دەخوازین بە زوترین کات وەڵامی ئیرادەو دەنگی ڕەوای هاووڵاتیان بدرێتەوەو لایەنەکان بگەنە ڕێکەوتنێک بۆ پێکهێنانی حکومەتێکی هاووڵاتیسەنتەریی و مەدەنیی و خزمەتگوزارو دادپەروەرو یاساسەروەر و تیوارو بەرپرسیار؛ کە لە ئاست بوون و ڕەسەنایەتیی و مێژوو خوێن و ژان و قوربانیدان و ڕەنج و تێکۆشان و وەفاو دەنگ و جوامێریی خەڵکی کوردستاندا بێ.