سەرۆكی شارەوانیی سلێمانی ڕایگەیاند، “چاوەڕوانی ئەنجومەنی وەزیرانین بۆ گەڕاندنەوەی ناوی ئەو فەرمانبەرانەی سوودمەنددەبن، دەشڵێت؛ داوا دەكەین ئەنجومەن ناوەكانمان بۆ بگەڕێننەوە”.

لەیلا عومەر، سەرۆكی شارەوانیی سلێمانی لە لێدوانێکدا ڕایگەیاند: “سەرجەم ئامادەكارییەكانی دابەشكردنی زەوی بەسەر فەرمانبەراندا تەواوكراون و چاوەڕوانی ئەنجومەنی وەزیرانین بۆ گەڕاندنەوەی ناوی ئەو فەرمانبەرانەی سوودمەنددەبن”.

ڕوونیشیکردەوە: “رەزامەندی دراوە بە دابینكردنی 13 هەزار دۆنم زەوی لە سنووری سلێمانی بۆ دابەشكردنی بەسەر فەرمانبەراندا و هەزار و 755 كەس لە سەرۆكایەتیی شارەوانیی سلێمانی سوودمەنددەبن”.

ئاشکراشیکرد: “هەموو شتێكمان ئامادەكردووە بەڕێوەبەرایەتییەكان سەرجەمیان ناوی فەرمانبەرانیان ئامادەكردووە و رەوانەی وەزارەتەكانی خۆیانیان كردووە و لەوێشەوە بۆ ئەنجومەنی وەزیران بەرزدەكرێنەوە، داوا دەكەین ئەنجومەنی وەزیران ناوەكانمان بۆ بگەڕێننەوە و دەست بە دابەشكردنی زەوی بكەین”.

باسی لەوەشکرد: “شوێنی دابەشكردنی زەوییەكان دەكەونە سنووری تاسڵوجە و تانجەرۆ و سۆتكەوە”.