وەزیری کاروباری ئایینیی پاکستان رایگەیاند، 50 هەزار هاوڵاتیی پاکستانی لە عێراق دیارنەماون، کە لەکاتی بەڕێوەچوونی مەراسیمی عاشوورا، ڕوویان لە عێراق کردبوو.

چودری سالیک، وەزیری کاروباری ئایینیی پاکستان لە لێدوانێکدا ڕایگەیاندووە: "50 هەزار هاوڵاتیمان دوای گەیشتنیان بە عێراق بۆ بەشداریکردن لە مەراسیمە ئاینییەکان، بێسەروشوێن بوون".

لەلایەکی دیکەشەوە، ئەحمەد ئەسەدی، وەزیری کار و کاروباری کۆمەڵایەتیی عێراق دەڵێت، 50 هەزار هاوڵاتییە پاکستانییەکە، بۆ کارکردن بە شێوەیەکی نایاسایی لە عێراق بوون. وەک خۆی دەڵێت، بابەتەکە "جێگەی سەرنجی ئێمە دەبێت و هەموو شتێک دەکەین بۆ گرتنەبەری ڕێوشوێنی یاسایی گونجاو".

ئەمەش لەکاتێکدایە، بەپێی ئامارە نافەرمییەکان، زیاتر لە یەک ملیۆن کرێکاری بیانی لە عێراق کاردەکەن و زۆرینەیان بێمۆڵەتن.

لە ماوەی بەڕێوەچوونی مەراسیمەکانی عاشوورا-ش، ژمارەیەکی زۆری بیانیی شیعە مەزهەب ڕوو لە عێراق دەکەن بۆ بەشداری لەو مەراسیمانە.