١٣ حوزەیرانی ٢٠٢٤
وەزارەتی تەندروستیی حکومەتی کاربەڕێکەری هەرێمی کوردستان ڕایگەیاند، بۆ جەژنی قوربان چەند ڕێوشوێنێک دەگرنەبەر، لەوانە "چاودێریکردنی سەربڕخانەکان، بەدواداچوون بۆ پرۆژەکانی خاوێنکردنەوە و پشکنینی ئاوی خواردنەوەی ماڵان".
وەزارەتی تەندروستیی حكومەتی کاربەڕێکەری هەرێمی كوردستان لە ڕاگەیەندراوێکدا چەند ڕێوشوێنێکی بڵاوکردووەتەوە کە لە جەژنی قورباندا "بۆ پاراستنی گیانی هاوڵاتییان" دەیگرێتەبەر.
ڕێوشوێنەکان ئەمانەن:
1- تیمەکانی تەندروستی بە هەماهەنگیی تیمەکانی ڤێتەرنەری، چاودێریی سەربڕخانەكان و مەرجە تەندروستییەکان دەکەن.
2- لیژنەی بەدواداچوون لە سەرجەم بەڕێوەبەرایەتییە گشتییەكان و نەخۆشخانەکان دەبن.
3- پزیشکانی پسپۆڕ و پەرستار و کارمەندانی تەندروستی ئێشک دەگرن.
4- بەدواداچوونی بەردەوام بۆ پرۆژەکانی خاوێنکردنەوە و دابینکردنی خۆراك دەكرێت.
5- نەخۆشخانەکانی فریاکەوتن و نۆرینگە دەرەکییەکان كراوە دەبن.
6- سەنتەرەکانی پێدانی چارەسەری کیمیاوی بۆ نەخۆشانی شێرپەنجە ئێشك دەگرن.
7- سەنتەرەکانی شووشتنی گورچیلە ئێشک دەگرن.
8- تیمەکانی فریاگوزاری و هێڵی (122) لە كاردا دەبن.
9- تیمەکانی پشکنینی ئاوی خواردنەوەی ماڵان و نەخۆشییە گوازراوەکان و چاودێریی تەندروستی، بەدواداچوونی بەردەوام دەكەن.
10- پێشکەشکردنی خزمەتگوزاریی تەندروستی بۆ ئاوارەکان لە کەمپەکان بەردەوام دەبێت.
11- تیمی تەندروستی لە شوێنە گەشتییارییەكان دەبن.