بەڕێوەبەری نەخۆشخانەی شەهید خالید گەرمیانی ڕایگەیاند، لە سنووری گەرمیان بەهۆی هەورەبرووسکەوە شوانێکی 14 ساڵ گیانی لەدەستدا.

سامان سەرتیپ، بەڕێوەبەری نەخۆشخانەی شەهید خالید گەرمیانی لە لێدوانێکدا ڕایگەیاند: "بەیانیی ئەمڕۆ دووشەممە، کاتژمێر 7:00 کەسێکیان هێنایە بەشی فریاکەوتنی نەخۆشخانەکەمان کە بەهۆی هەورەبرووسکەوە گیانی لەدەستدابوو. ئەو کەسە ناوی شێرکۆ نوعمانە، تەمەنی 14 ساڵە و خەڵکی ناوچەی داوودەیە لە کفری".

ئاماژەی بەوەش کرد، بە وتەی کەسوکارەکەی، ئەو کوڕە پیشەی شوانییە، لە ماڵ دەرچووە و ڕۆیشتووە بۆلای ئاژەڵەکانی، کە هەر لەنزیک ماڵی خۆیانە، لەوێ هەورەبرووسکە لێیداوە و گیانی لەدەستداوە.

سامان سەرتیپ ئەوەشی خستەڕوو، بۆ توێکاریی زیاتر، تەرمی ئەو کوڕە 14 ساڵە دەبرێتە دادپزیشکی کەلار.