بەرەبەیانی ئەمڕۆ لە بەشێکی باڵەخانەی ئەنجوومەنی وەزیرانی هەرێمی کوردستان ئاگر کەوتەوە. وتەبێژی بەرگریی شارستانیی هەولێر دەڵێت، هۆکارەکە تەقینی بۆیلەری ئاو و بوتڵی ‌گاز بووە.

موقەدەم کاروان میراودەلی، وتەبێژی بەرگریی شارستانیی هەولێر ئەمڕۆ شەممە رایگەیاند، "کاتژمێر 12:50ـی بەرەبەیانی ئەمڕۆ لە ئاگرەکەی ئەنجوومەنی وەزیران ئاگادار کراینەوە و دوای ماوەیەکی کەم تیمەکانمان کۆنترۆڵیان کرد".

کاروان میراودەلی وتی، "ئەو شوێنەی ئاگرەکەی تێدا کەوتووەتەوە، چێشتخانە بووە و زیانە مادییەکانی لەنێوان 20 ملیۆن بۆ 25 ملیۆن دیناردایە".

لەبارەی هۆکاری ئاگرەکەشەوە وتەبێژی بەرگریی شارستانی هەولێر وتی، "بۆیلەر (گیزەر)ـی ئاو گەرمکردن تەقیوە؛ لەو شوێنە بوتڵێکی گازیش هەبووە و کارلێکیان کردووە و ئەویش تەقیوەتەوە و تەشەنەی بە ئاگرەکە داوە".