وەزارەتی تەندروستیی عێراق، دەرگای دامەزراندن بۆ دەرچووانی كۆلێژ و پەیمانگە پزیشكی و تەندروستییەكانی هەرێمی كوردستان دەكاتەوە و داوادەكات ئەوانەی دەیانەوێت دابمەزرێن فۆڕم پڕبكەنەوە.
وەزارەتی تەندروستیی عێراق لە راگەیەندراوێكدا داوا لە دەرچووانی كۆلێژ و پەیمانگە پزیشكی و تەندروستییەكانی هەرێمی كوردستان لە رێگەی فۆڕمی ئەلكترۆنییەوە داواكاری پێشكەشبكەن بۆ دامەزراندن لە كەرتی تەندروستیی عێراق.
هاوكات ساڵح مەهدی حەسناوی، وەزیری تەندروستیی عێراق داوا لە خوازیارانی ئەو بەشە پزیشكییانەی هەرێم دەكات كە دەرچووی 2022 بۆ 2023ـن، فۆڕمی دامەزراندن پێشكەشبكەن.
ئاماژەی بەوەشكردووە، فۆڕمەكە بۆ ماوەی 15 ڕۆژ لەسەر ماڵپەڕی وەزارەتی تەندروستی بە كراوەیی دەمێنێتەوە بۆ ناوتۆماركردن.
پێشتر تەندروستیی عێراق ڕایگەیاندبوو، كەرتی تەندروستی پێویستی بە پێنج هەزار پزیشك و 10 هەزار پەرستار و كارمەندی تاقیگە هەیە.

عێراق دەرچووانی ئەم بەشەی هەرێم دادەمەزرێنێت

کۆنسوڵخانەی چین ڕوونکردنەوە لەبارەی شامپۆی بریملس دەدات و دەڵێت، پشکنین و بەدواداچوون دەکەن بۆ دۆزینەوەی سەرچاوە و کەناڵی هاوردەکردنی.
وتەبێژی کۆنسوڵخانەی گشتیی چین لە هەولێر لە لێدوانێکدا ڕایگەیاند: "ئێمە سەرنجمان به‌و ڕاپۆرتانە داوه‌ کە لەلایەن هەندێک لە دەزگاکانی ڕاگەیاندن بڵاوكراونه‌ته‌وه‌ سەبارەت بە بەرهەمێکی شامپۆ بە ناوی بریملس "Brimles Herbal-Bubble"، لێره‌دا ده‌مانه‌وێت هاوسۆزیی خۆمان بە بەکارهێنه‌رانی ئه‌و به‌رهه‌مه‌ بگەیەنین".
هاوکات ئامادەیی کۆنسوڵخانەکەشی بۆ هه‌ماهه‌نگی لەگەڵ لایه‌نه‌ پەیوەندیدارەکانی حکومەتی کاربەڕێکەری هەرێمی کوردستان ڕاگەیاند بەمەبەستی زانینی سەرچاوە و کەناڵی هاوردەکردنی ئەو بەرهەمە و زانیاری سەبارەت بە ئەنجامی پشکنینی کوالێتی.
جەختیشی کردەوە، حکومەتی چین گرنگییەکی زۆر بە کوالێتی و سەلامەتیی کاڵاکانی هەناردەکردنی چین ده‌دات، فه‌رمانگه‌كانی ڕێکخستنی بازاڕ و گومرگ بەتووندی بڕگە پەیوەندیدارەکانی یاسای کۆماری میللی چین سەبارەت بە کوالێتیی بەرهەم بە پشکنینی کاڵای هاوردە و هەناردەکردن جێبەجێدەکەن.
بریملس، جۆرە شامپۆییەکی چینییە، سەرەتای ئەمساڵ لە سلێمانی و هەولێر هەستیاریی پێستی بۆ دوو هاونیشتمانی دروستکرد، ئەمەش وایکرد بەدواداچوون بۆ ئەم بابەتە بکرێت پشکنینی تاقیگە دەریخست شامپۆکە شیاو نییە بۆ بەکارهێنان چونکە هەستیاری دروستدەکات، بۆیە لە سلێمانی دەست بەسەر بڕێکی شامپۆکەدا گیرا و لە هەولێریش لە بازاڕ کۆدەکرێتەوە و لەناودەبرێت.

کۆنسوڵخانەی چین لەبارەی ئەو شامپۆیەی هەستیاریی پێست دروستدەکات ڕوونکردنەوە دەدات

خزمەتگوزاریی نیشتمانیی تەندروستیی ئینگلتەرا ڕایگەیاند، دەرمانێکی نوێیان بەرهەمهێناوە کە پەرەسەندنی شێرپەنجەی منداڵدان لە ژناندا هێواش دەکاتەوە.
ئەمڕۆ چوارشەممە، خزمەتگوزاریی نیشتمانیی تەندروستیی ئینگلتەرا لە ڕاگەیەندراوێکدا بڵاویکردەوە، دەرمانێکیان بەرهەمهێناوە بۆ باشترکردنی ژیانی سەدان ژنی تووشبوو بە شێرپەنجەی منداڵدان و پەرەسەندنی شێرپەنجەی منداڵدان لە ژناندا هێواش بکاتەوە.
ئاماژەی بەوەش کردووە، دەرمانەکە ناوی "دۆستارلیماب"ـە و بە ناوی مارکەی "جێمپەرلی" بڵاودەکرێتەوە، لەگەڵ ژەمە چارەسەری کیمیاییدا دەدرێت بەو ژنانەی توشبووی ئەو جۆرە شێرپەنجەیەن.
بەپێی ڕاگەیەندراوەکە: "دەرمانەکە دەبێتە هۆی ڕاکێشانی هەندێک پرۆتین بۆ سەر ڕووی خانە شێرپەنجەییەکان و دەبێتە هۆی ئەوەی سیستمی بەرگری بەهێز بکات و کاریگەریی خانە شێرپەنجەییەکە کەمببێتەوە".
شێرپەنجەی ناوپۆشی منداڵدان، جۆرێکە لە شێرپەنجە کە لە منداڵدانی ئافرەتدا دەستپێدەکات، بە چوارەم باوترین جۆری شێرپەنجە لە خانماندا دادەنرێت و بە گشتی خانمانی سەرو 55 ساڵ تووشی دەبن.

دەرمانێکی نوێ بۆ نەخۆشیی شێرپەنجە دۆزرایەوە

وەزارەتی تەندروستیی حکومەتی کاربەڕێکەری هەرێم، بڕیاریدا بە قەدەغەکردنی ڕاکێشان و بانگهێشتکردنی نەخۆش لە نەخۆشخانە گشتییەکانەوە بۆ تایبەت.
وەزارەتی تەندروستیی حکومەتی کاربەڕێکەری هەرێمی کوردستان بەرواری ئەمڕۆ دووشەممە 19ی شوبات نوسراوێکی ئاڕاستەی بەڕێوەبەرایەتییە گشتییەکانی تەندروستی لە قەزا و ناحیەکان کراوە و واژۆی د. سامان بەرزنجی، وەزیری تەندروستیی لەسەرە.
لە نوسراوەکەدا، وەزارەتی تەندروستی باسی لەوە کردووە کە لە پێناو بەرژەوەندیی گشتی و پاراستنی مافی نەخۆش و رێگریکردن لە دیاردەی ریکلامکردن، پێدانی کارتی کەسی یان کارتی تایبەتی نۆرینگە، تاقیگە و سەنتەر و نەخۆشخانە یاخود هەر دامودەزگایەکی کەرتی تایبەت لەناو نەخۆشخانەی گشتی و بۆ نەخۆش قەدەغەیە و نابێت نەخۆش ناچار بکرێت بۆ سەردانی نۆرینگە و نەخۆشخانەی تایبەت.
ئەوەش هاتووە، بە پێچەوانەوە هەر پزیشك و کارمەندی تەندروستی یان هەر فەرمانبەرێک بەرپرسیار دەبێت و رێکاری یاسایی و کارگێڕی لەبەرامبەردا دەگیردرێتەبەر.

<img src="https://scontent.fisu1-3.fna.fbcdn.net/v/t1.15752-9/426106847_436756882010860_349605821635577997_n.jpg?_nc_cat=107&ccb=1-7&_nc_sid=8cd0a2&_nc_ohc=CZYlcjgauLMAX9HN5nB&_nc_ht=scontent.fisu1-3.fna&oh=03_AdQsPTw5vDFWdJz_Cw_ok49qSfTkFbCfbYQLD0-ZmQW7Jw&oe=65FB1CD1" alt="undefined" style="height: auto;width: auto"/>

ڕاکێشانی نەخۆش بۆ نەخۆشخانەی تایبەت قەدەغەکرا

بەڕێوەبەرى پێشووى تەندروستیى قەزای چەمچەماڵ ڕایگەیاند، ئاوى خواردنەوە و سەربڕخانەکانى قەزاکە لە زبڵدان پیسترن. هاوکات لەبارەى هۆکارى لابردنیشی لە پۆستەکەى دەڵێت: "وامزانى گەر تاوان کەشف بکەم ڕێزم لێدەگرن، کەچى دەریانکردم".
د. فەرهاد محەمەد، بەڕێوەبەرى پێشووى تەندروستیى قەزای چەمچەماڵ لە ڕونکردنەوەیەکیدا کە لە لاپەڕەى تایبەتى خۆى بڵاویکردووەتەوە نوسیویەتى: "داوام لێدەکرێت هۆکارى بەزۆر دەستلەکارکێشانەوەم ئاشکرا بکەم، لەگەڵ ئەوەى پێشتر دوو جار داواى دەستلەکارکێشانەوەم کردبو، بەڵام پەسەند نەکرابو".
نوسیویشیەتی: "ئەوەى لەگەڵ هاوڕێکانمان و لەماوەى دەستبەکاربونمان بۆ تەندروستى چەمچەماڵمان کردووە بە درێژایی رابردوى ئەم سێکتەر و شارەکەش نەکراوە، سودى چییە قسەکردن لەکاتێکدا هەموو خەڵکى کوردستان و چەمچەماڵ زانیان حەوزى سەرەکى ئاوى خواردنەوە حەوت ساڵە پاک نەکراوەتەوە، لەسەرى هاتومەتە دەنگ بەڵام دەریان کردم".
د. فەرهاد محەمەد لە ڕوونکردنەوەکەیدا ئاماژەی بەوەشداوە: "سودى چییە گەر هەموو خەڵکى چەمچەماڵ ئاگادار بکەمەوە کە سەربڕخانەکانیان لە زبڵدان پیسترە و هیچ مەرجێکى تەندروستیان تێدا نییە".
لە بەشێکى تری نوسینەکەیدا، باس لە بێدەنگیى بەڕێوەبەر، فەرمانگە، بەرپرسە حزبییەکان نوسەر و ڕۆژنامەنوسان دەکات و ئەوەی خستووەتەڕوو: "ویستم ئەمجارە وەک ئەوان دەست بە کڵاوەکەمەوە بگرم با نەیبات و شار بۆ هەتاهەتایە جێبێڵم و خەریکى ژیانى تایبەتى خۆم بم".
ئاماژەى بەوەشکردووە: "تەنها چەمچەماڵ هێندەى فەرەنسا و ئەڵمانیا سامانى سروشتى هەیە کەچى 15 رۆژ جارێک ئاوى خواردنەوەیان پێدەدرێت و ئەو ئاوەش حەوت ساڵە لەناو زبڵداندا گلدەدرێتەوە، سودى چییە ئاگاداریان بکەمەوە؟".
هاوڵاتییانیش ئاگاداردەکاتەوە کە: "حەوت ساڵە حەوزى ئاوى خواردنەوەى چەمچەماڵ پاک نەکراوەتەوە و سەربڕخانەکانى شارەکە مەرجى تەندروستیان تێدا نییە، وامزانى ئەگەر تاوان کەشف بکەم رێزم دەگرن، کەچى دەریانکردم".
بەڕێوەبەرى پێشووى تەندروستیى قەزای چەمچەماڵ نوسیویشیەتى: "وامزانی ئەگەر تاقیگەی ناوەندی و سەنتەری گورچیلەی دەستکرد و سەنتەری پسپۆڕی ددان و سەنتەری فریاکەوتن وخودەج و پزیشکی دادوەری ودەیان هۆبە و بەش و هۆڵی منداڵبون و دو نەخۆشخانە و سەدان ئامیری پزیشکی و ئۆتۆمبێلی گواستنەوەی دەرمان و ئیسعاف و بەبڕی هەشت ملیار دینار کەلوپەل لەم قەیرانەدا بۆ ئەم تەندروستی ئەم شارە بکڕم، پەیکەری ڕیزلێنانم بۆ دروست دەکەن و مندڵەکانم شانازی بە پەیکەرەکەی باوکیانەوە دەکەن کەچی لەبەر خاتری خاترداران کە خانویان لەسەر حەوزی ئاوخواردنەوەی شارەکە دروستکردبو، دەریان کردم".
لە کۆتایی ڕوونکردنەوەکەدا، د. فەرهاد باسی لەوەکردووە: "ئێستا داواکارى گشتى ئەم نوسینانە دەبینێت و دەزانێت بەهۆى کەسێکەوە ئاوى خواردنەوەى چەمچەماڵ پاک نەکراوەتەوە، بزانم لەسەرى یەتە دەنگ".
لە مانگى ئەیلولى ئەمساڵ، د. فەرهاد محەمەد لە ئاگادارییەکدا کە ئاڕاستەى قائیمقامیەتى قەزاى چەمچەماڵى کردووە هۆشداریی داوە کە بە هێواشى خەڵکى چەمچەماڵ "جینۆساید دەکرێن" و سەرچاوى ئاوى خواردنەوە بەهۆى کەسێکەوە ڕێگریی لە پاککردنەوەى دەکرێت و ئەو ئاوەى دەدرێتەوە هاوڵاتییان پیسە و شیاوى خواردنەوە نییە.

<img src="https://scontent.fisu10-2.fna.fbcdn.net/v/t39.30808-6/408184360_929979105795720_5739454325135315507_n.jpg?_nc_cat=105&ccb=1-7&_nc_sid=524774&_nc_ohc=5O1faClDeOAAX8gAYWI&_nc_ht=scontent.fisu10-2.fna&oh=00_AfCvRw4Pag4ml_vcZYLsqyOtEUIzFNBkvoAOcSQ96QYEwg&oe=657786E2" alt="undefined" style="height: auto;width: auto"/>

بەڕێوەبەری پێشووی تەندروستیی چەمچەماڵ: ئاوى خواردنەوەی قەزاکە لە زبڵدان پیسترە

دەستەی تەندروستیی گشتیی سعودیە داوایکردووە، بەهۆی بڵاوبوونەوەی چەند جۆرێک پەتاوە؛ هاوڵاتییانی ئەو وڵاتە سەردانی هەریەکە لە وڵاتەکانی عێراق، سوریا و سودان نەکەن.
دەستەی تەندروستیی گشتیی سعودیە لە ڕاگەیەندراوێکدا بڵاویکردەوە، عێراق، سوریا و سودان گڵۆپی زەردیان بۆ هەڵکراوە لە بڵاوبوونەوەی چەند جۆرێک پەتای ڤایرۆسیدا.
لەبەر ئەم هۆکارەش دەستەکە داوای لە هاوڵاتییانی سعودیە کردووە، سەردانی ئەو وڵاتانە نەکەن.
لە ڕاگەیەندراوەکەدا ئەوەش هاتووە، پەتای ئاوڵەی مەیمون، تای زنک و کۆرۆنا لەو پەتایانەن کە لە سودان بەربڵاون، لە سوریاش جگە لە تۆمارکردنی حاڵەتەکانی کۆرۆنا هێشتا پەتای کۆلێرا بەشێوەیەکی بەربڵاو هەیە.
دەستەی تەندروستیی گشتیی سعودیە لەبارەی عێراقەوە ئاماژەی بەوەداوە، پەتای کۆرۆنا، تای کۆنگۆ و سورێژە لەو نەخۆشییانەن لە عێراقدا بەربڵاون.

سعودیە داوا لە هاوڵاتییانی دەکات سەردانی عێراق نەکەن

وەزیری تەندروستیی حکومەتی کاربەڕێکەری هەرێم ڕایگەیاند، نابێت دەرمان و پێداویستیی پزیشکی لە ڕێگەی سۆشیاڵ میدیاوە بفرۆشرێت. داواش لە هاوڵاتییان دەکات، لە ڕێگەی ئۆنڵاینەوە دەرمان و پێداویستیی پزیشکی نەکڕن.
ئەمڕۆ سێشەممە، سامان بەرزنجی وەزیری تەندروستیی حکومەتی کاربەڕێکەری هەرێمی کوردستان لە کۆنفراسێکی ڕۆژنامەنووسیدا ڕایگەیاند، هاوڵاتیتان دەبێت خۆیان بەدووربگرن لە کڕینی دەرمان و پێداویستیی پزیشکی لە ڕێگەی سۆشیاڵ میدیاوە.
ئاماژەی بەوەش کرد: "سۆشیاڵ میدیا نابێت بە بنەمایەک بۆ چارەسەر و خزمەتگوزاریی تەندروستی، چونکە زۆربەی ئەو پەیج و هەژمارانەی ریکلام بۆ دەرمان و پێداویستیی پزیشکی دەکەن، نافەرمی و نایاسایین".
سامان بەرزنجی ئەوەشی خستە ڕوو، نەشتەرگەریی درێژکردنی باڵا بەمەبەستی جوانکاری، بە هەموو شێوەیەک ڕێگەپێنەدراوە، تەنیا لە حاڵەتێکدا نەبێت کە ئەو کەسە لەڕووی تەندروستییەوە کێشەی هەبێت لە ناڕێکیی قاچەکانی.
وتیشی، هەر پزیشکێک لە هەر نەخۆشخانەیەک ئەو نەشتەرگەرییە بەمەبەستی جوانکاری ئەنجامبدات، تاوانبارە و لێپرسینەوەی لەگەڵ دەکرێت.

سامان بەرزنجی بۆ هاوڵاتییان: لە ڕێگەی ئۆنڵاینەوە دەرمان مەکڕن

به‌ڕێوه‌به‌ری گشتیی ڕێكخراوی ته‌ندروستیی جیهانی ڕایگەیاند، پەیوەندییان لەگەڵ نەخۆشخانەی شیفا لە غەززە پچڕاوە و بەپێی دوایین هەواڵەکان، تانکەکان نەخۆشخانەکەیان گەمارۆداوە.
تێدرۆس ئەدهانۆم گێبرەیەسوس به‌ڕێوه‌به‌ری گشتیی ڕێكخراوی ته‌ندروستیی جیهانی پەیامێکی لە هەژماری خۆی لە تۆڕی کۆمەڵایەتیی X بڵاوکردەوە و ڕایگەیاندووە، هەواڵی بۆردومانکردنی نەخۆشخانەکان بە بەردەوام دەگات و ترس و دڵەڕاوکێیەکی زۆر هەیە لەبارەی دۆخەکە.
ڕاشیگەیاندووە کە پەیوەندییەکانیان لەگەڵ نەخۆشخانەی شیفا پچراوە و بەپێی دوایین هەواڵەکان، تانکەکان نەخۆشخانەکەیان گەمارۆداوە و هەر کەسێک لێی دەربچێت تەقەی لێدەکەن.
به‌ڕێوه‌به‌ری گشتیی ڕێكخراوی ته‌ندروستیی جیهانی باسی لەوەشکردووە، کە نیگەرانن لەم دۆخە و تاکە ڕێگەی ڕزگاری خەڵکی غەززە ڕاگەیاندنی ئاگربەستی مرۆییە.
گێبرەیەسوس بەو شێوەیە بەردەوام بووە و نوسیویەتی: "ڕێكخراوی ته‌ندروستیی جیهانی خوازیاری ئەوەیە بریندارەکان و ئەوانەی دۆخی تەندروستییان ناجێگیرە بە شێوەیەکی ڕێکوپێک، بێ کێشە و لە ئاسایشی تەواودا ناوچەکە چۆڵبکەن. هەموو دیلەکان وەک یەک پێداویستییە تەندروستییەکانیان بۆ دابینبکرێت و بە بێ مەرجیش ئازاد بکرێن".

ته‌ندروستیی جیهانی: پەیوەندیمان لەگەڵ نەخۆشخانەی شیفا لە غەززە پچڕاوە

سەرۆکی حکومەتی کاربەڕێکەری هەرێمی کوردستان ڕایگەیاند، ساڵانە لە سندووقی شێرپەنجە زیاتر لە 70 ملیار دینار هاوکاری بۆ تووشبووانی شێرپەنجە خەرج دەکرێت، داواش لە بەغدا دەکات بۆ دابینکردنی دەرمان و چارەسەرکردنی نەخۆش زیاتر هاوکارییان بکات.
ئەمڕۆ دووشەممە مەسرور بارزانی، سەرۆکی حکومەتی کاربەڕێکەری هەرێمی کوردستان لەکاتی بەشداریکردنی لە رێوڕەسمی دانانی بەردی بناغەی سەنتەری چارەسەری نەخۆشیی شێرپەنجە بە رێگەی تیشک، وتارێکی پێشکەشکرد.
مەسرور بارزانی لە وتارەکەیدا ڕایگەیاند: "بە دانانی ئەم خزمەتگوزارییە لە دهۆک، پێویست بە ناردنی نەخۆش (تووشبووی شێرپەنجە) بۆ دەرەوەی وڵات یان شاری دیکە ناکات".
وتیشی: ''ئەمڕۆ نەخۆشیی شێرپەنجە لە جیهاندا گرفتێکی گەورەیە و سەرەڕای پێشکەوتنێکی باش لە بواری ئاگادارکردنەوە، بەداخەوە هەر ساڵ ئەگەر و فاکتەری جیاجیا، وەکو هۆکاری ژینگەیی، خواردن، زوو دەستنیشاننەکردنی حاڵەتی شێرپەنجە دەبێتە هۆی گیانلەدەستدانی ملیۆنەها کەس لە جیهان".
مەسرور بارزانی داواشی لە حکومەتی فیدراڵی کرد لەرووی دابیکردنی دەرمان، ئامێر و پێداویستیی پزیشکی، زیاتر هاوکاریی حکومەتی کاربەڕێکەری هەرێم بکات، "بەتایبەتی بۆ ئاوارە و پەنابەرانی نیشتەجێ لە شار و ناوچە جیاجیاکانی کوردستان".
وتیشی: ''داوا لە رێکخراوە ناوخۆیی و نێودەوڵەتییەکانیش دەکەم زیاتر هاوکار و پشتیوانی توشبووانی شێرپەنجە بن".

مەسرور بارزانی: داوا لە بەغدا دەکەین بۆ دابینکردنی دەرمان هاوکاریمان بکات

بەڕێوەبەرایەتی دامەزراوەی کۆنترۆڵی جۆری دەرمانی حکومەتی کاربەڕێکەری ھەرێم ڕایگەیاند، لەسەر داوای کارگەی بەرھەمھێن "ئەسینۆ" بڕیاریاندا بە ڕاکێشانەوەی بەرھەمێکی دەرمان بە گشت جۆرەکانییەوە و قەدەغەکردنی.
بەڕێوەبەرایەتی دامەزراوەی کۆنتڕۆڵی جۆری دەرمانی حکومەتی کاربەڕێکەری ھەرێمی کوردستان ڕایگەیاند: "لەبەر پاراستنی تەندروستی ھاوڵاتییان و لەسەر داوای کارگەی بەرھەمھێن "ئەسینۆ" بڕیاریاندا بە ڕاکێشانەوەی بەرھەمی "میسپۆڕین" بە گشت جۆرەکانییەوە، کە لە بازاڕەکانی ھەرێمی کوردستان بەردەستن بۆ کۆگای کۆمپانیای دابەشکار بەمەبەستی لەناوبردنیان".
باسی لەوەشکرد، ئەم بڕیارە دوای ئەوە دێت کەوا بەرھەمی ناوبراو لەدوای وەرگرتنی مۆڵەتی بەبازاڕکردن دوای ماوەیەک دەرکەوتووە چەند ژمارە باجێکی لایداوە لە تایبەتمەندییە پەسەندکراوەکانی کۆتایی بەرھەمەکە.
دامەزراوەی کۆنتڕۆڵی جۆری دەرمانی ئاگاداری سەرجەم دەرمانخانە و نەخۆشخانەکان دەکاتەوە، کە بەھیچ شێوەیەک مامەڵە بەو دەرمانە نەکەن تا دووبارە بڕیاری پێویست لەوبارەیەوە لە بەڕێوەبەرایەتییەکەیان دەردەچێت وە ئەو بڕەی ھەیانە بیگەڕێننەوە بۆ کۆمپانیای دابەشکار یان بۆ ئەو کۆگایەی کە دەرمانەکەی لێوە کڕدراوە، بەپێچەوانەوە لە ھەر شوێنێک مامەڵەی پێوەبکرێت یاخود بەکاربێت ڕێکاری یاسایی لە بەرامبەردا دەگیرێتەبەر.

جۆرێکی دەرمان لە ھەرێم قەدەغەکرا

وتەبێژی وەزارەتی تەندروستیی حکومەتی کاربەڕێکەری هەرێم لەبارەی دەنگۆیەک کە باسی لەوەدەکرد گواستنەوەی نەخۆش بە ئۆتۆمبێلی فریاكەوتن (ئەمبوڵانس) بووە بە پارە ڕایگەیاند، هەواڵەکە دوورە لە ڕاستییەوە.
سەركار سورچی وتەبێژی وەزارەتی تەندروستیی حکومەتی کاربەڕێکەری هەرێمی کوردستان ڕاگەیەندراوێکی لەڕێی پەڕەی فەرمیی وەزارەتەوە بڵاوکردووەتەوە، تێیدا هاتووە: "لە یەكێك لە دیجیتاڵ میدیاکانی هەرێمی کوردستان، هەواڵێكی چەواشەكارانە و دوور لە ئەتەكێتی میدیایی بڵاو كراوەتەوە کە گوایە گواستنەوەی نەخۆش بە ئۆتۆمبێلی فریاكەوتن (ئەمبوڵانس) بووە بە پارە و نرخی بۆدانراوە".
ئاماژەی بەوەشداوە: "هاووڵاتییانی خۆشەویست دڵنیادەكەینەوە ئەم هەواڵە دوورە لە ڕاستی و گواستنەوەی نەخۆش بە ئۆتۆمبێلەكانی فریاكەوتن (ئەمبوڵانس) بە خۆڕاییە بە شەو و بەڕۆژ لە تەواوی هەفتەدا، بە بێ هیچ نرخ و خەرجییەكە لە خزمەت هاووڵاتییاندایە".
ئەوەش خراوەتەڕوو: "لە هەمانكاتدا ڕایدەگەیەنین كە بە پێی ڕێنماییەكی وەزارەتمان ڕێگە دەگیرێت لە قۆستنەوە و قۆرخكاری لە نرخی گواستنەوەی نەخۆش لە لایەن ئۆتۆمبێلەكانی فریاكەوتنی كەرتی تایبەت (ئەمبوڵانسی ئەهلی) و نرخەكان كەمكراوەتەوە و سنوورداركراوە و یەكخراوە بۆ كەمكردنەوەی بارگرانی لەسەر شانی هاووڵاتییان".

وەزارەتی تەندروستی لەسەر دەنگۆیەک هاتەدەنگ

بەگوێرەی ڕیزبەندی ماڵپەڕی IQAir، هەوای شاری بەغدا لە ڕیزبەندی چوارەمی ئەو وڵاتانەیە کە ڕێژەی پیسی هەواکەیان بەرزە.
تا ئامادەکردنی ئەم هەواڵە ڕیزبەندی پیسترین هەوای شارەکانی جیهان بەم جۆرەیە:
شاری کاراچی پاکستان پلەی یەکەمی هەیە لە پیسبوونی هەوا، ئەمڕۆ رێژەکەی 248 پلەیە.
شاری نیودلهی هیندستان پلەی دووەمی جیهانی هەیە، ئەمڕۆ 161 پلەیە.
شاری لاهوری پاکستان پلەی سێیەمی هەیە، ئەمڕۆ 152 پلەیە،
شاری بەغدا پایتەختی عێراق پلەی چوارەمی هەیە، ئەمڕۆ 134 پلەیە،
شاری پەکینی پایتەختی چین پلەی پێنجەمی هەیە، ئەمڕۆ 132 پلەیە.
هەر بەپێی ماڵپەڕەکە، ڕادەی پیسی هەوا ئەگەر ڕێژەکەی لەنێوان ژمارە یەک بۆ 50 بوو گونجاوە، بەڵام لە ژمارە 51 بۆ 100 مامناوەندە، لە 101 بۆ 150 گونجاو نییە بۆ ئەوانەی هەستیارییان هەیە، بە تایبەت بۆ ئەوانەی نەخۆشی هەناسەتەنگیان هەیە، لە 151 بۆ 200 نا تەندروستە و گونجاو نییە بۆ ژیان.
شاری بەغدا بە دیاریکراوی لە 26ی ئایاری 2023، ڕیزبەندی یەکەمی هەبوو کە هەواکەی پیس بووە.